Թուրքիայի քրդամետ կուսակցության պատգամավորը 1,3 տարվա ազատազրկման է դատապարտվել
Թուրքիայի քրդամետ Ժողովուրդների դեմոկրատական կուսակցության պատգամավոր Իբրահիմ Այհանը Քրդական բանվորական կուսակցության (PKK) և Սիրիայի «Ժողովրդի պաշտպանության ուժերի» (YPG) անդամ երկու մահացած զինյալի նկար հրապարակելու համար դատապարտվել է ազատազրկման: Այս մասին հայտնում է թուրքական Diken պարբերականը:
Դատախազը մեղադրել է պատգամավորին «ահաբեկչական խմբավորման քարոզչությունն» իրականացնելու մեջ՝ նրա համար պատիժ պահանջելով:
Այհանի փաստաբանը պաշտպանության ժամանակ նշել է, որ իր պաշտպանյալը որևէ հանցանք չի գործել և դատվում է ընդդիմադիր հայացքների համար՝ պահանջելով նրան անմեղ ճանաչել: Դատարանը, սակայն, վճիռ է կայացրել պատգամավորին 1 տարի և երեք ամիս ազատազրկելու մասին:
Փաստաբանը հայտնել է, որ իրենք պատրաստվում են բողոքարկել դատարանին որոշումը:
Ներկայում կալանքի տակ են գտնվում քրդամետ կուսակցության 11 պատգամավոր, այդ թվում և առաջնորդ Սելահաթթին Դեմիրթաշը: Կուսակցության մյուս համանախագահ Ֆիգեն Յուքսեքդաղը և պատգամավոր Նուրսել Այդողանը զրկվել են պատգամավորական մանդատից:
