Ֆիլիպինների նախագահը խորհրդարանին խնդրել է երկարացնել ռազմական դրությունը Մինդանաոյում
Ֆիլիպինների նախագահ Ռոդրիգո Դուտերտեն խնդրանք է հղել երկրի Կոնգրեսին՝ մինչեւ 2017 թվականի վերջը երկարացնելու ռազմական դրությունը Մինդանաո կղզում: Այս մասին հաղորդել է Reuters գործակալությունը:
«Նա (Դուտերտեն) պետք է պատկերացում կազմի տեղական ահաբեկչական խմբավորումների եւ այն ամենի մասին, ինչը Մինդանաոյում սպառնում է հասարակական անվտանգությանը»,- մեջբերում է անում գործակալությունը նախագահի մամուլի քարտուղար Էռնեստո Աբելայի խոսքից:
Մայիսի 23-ին «Մաուտե» ծայրահեղական խմբավորման զինյալները, որը կապված է «Իսլամական պետություն» ահաբեկչական կազմակերպության հետ, Մինդանաո կղզու Մարավի քաղաքում գրոհել են անվտանգության ուժերի վրա: Հենց նույն օրը Դուտերտեն ռազմական դրություն է սահմանել կղզու տարածքում, որտեղ հունիսի ընթացքում շարունակվել են զինյալների հետ կառավարական զորքերի կատաղի ընդհարումները, հաղորդել է ՏԱՍՍ-ը:
