«ԱՄՆ ներկայացուցիչների պալատը ԻԻՀ դեմ նոր պատժամիջոցների փաթեթ է նախատեսում». Ահարոն Վարդանյան
Իրանագետ Ահարոն Վարդանյանը ֆեյսբուքյան իր էջում գրում է. «ԱՄՆ ներկայացուցիչների պալատը ԻԻՀ դեմ նոր պատժամիջոցների փաթեթ է նախատեսում:
Այնպես է ստացվել, որ պատժամիջոցների այս նոր փաթեթի մասին հայտարարությունները պատահաբար կամ դիտավորյալ համընկել են ԻԻՀ ԱԳ նախարար Մ․ Ջ․ Զարիֆի՝ ՄԱԿ-ի գլխավոր ասամբլեայի նիստին մասնակցելու նպատակով Նյու Յորք մեկնելու հետ։
Սպասվում է, որ Իրանի արտաքին գերատեսչության ղեկավարը, օգտվելով իր՝ ԱՄՆ-ում գտնվելու առիթից, մի շարք հանդիպումներ կունենա ԱՄՆ բարձրաստիճան անձանց հետ՝ փորձելով ինչ-որ չափով կամ մեղմել ԱՄՆ-ԻԻՀ գերլարված հարաբերությունները կամ գոնե, այսպես ասած, հարաճուն-լարված վիճակից բերել կայուն-լարված վիճակի։
Եվ այս համատեքստում ԱՄՆ-ի կողմից Իրանի դեմ պատժամիջոցների նոր փաթեթի մասին հայտարարելը, հավանաբար ցուցիչ է լրացուցիչ ճնշման և կոշտ դիրքորոշման։
ԱՄՆ նախագահ Դ․ Թրամփը իր պաշտոնավարման հենց սկզբից էլ Իրանի հետ հարաբերություններում բավականին կոշտ դիրքորոշում է որդեգրել և նույնիսկ հասցրել է հայտարարել, որ ԱՄՆ նախկին նախագահ Բ․ Օբամայի կողից ստորագրված միջուկային համաձայնությունը թյուրիմացություն է և այն պետք է չեղարկել, բայց այստեղ պետք է հաշվի առնել նաև ԻԻՀ ԱԳ նախարար Մ․ Ջ․ Զարիֆի՝ փորձառու դիվանագետ և հմուտ բանագնաց լինելու հանգամանքը։
Համենայնդեպս, ինչպես իրանական, այնպես էլ միջազգային հանրությունը Մ․Ջ․ Զարիֆի այս այցից ինչ-որ սպասելիքներ ունի, թե ինչ՝ հետագան ցույց կտա»։
