ՊՊԾ գրավման գործով բոլոր ամբաստանյալները հեռացվեցին նիստերի դահլիճից
Երեւանի Ավան եւ Նոր Նորք վարչական շրջանների ընդհանուր իրավասության դատարանում դատավոր Արտյուշ Գաբրիելյանի նախագահությամբ հուլիսի 6-ին շարունակվում է Պարեկապահակային ծառայության գնդի գրավման անջատված գործով 18 մեղադրյալների երկրորդ դատական նիստը:
Դատավորը սանկցիա կիրառեց պաշտպաններ Լուսինե Սահակյանի ու Երվանդ Վարոսյանի նկատմամբ` պատասխանատվության ենթարկելու վերաբերյալ դիմումով դիմելով փաստաբանական պալատ: Նրանք չէին ներկայացրել դատական նիստերի դահլիճ:
«Արմենպրես»-ի հաղորդմամբ՝ ամբաստանյալ Արամ Մանուկյանը նշեց, որ դուրս է գալու դատական նիստերի դահլիճից մինչև մյուս ամբաստանյալները ներկա չգտնվեն նիստերի դահլիճում:
Դատավոր Արտյուշ Գաբրիելյանը Արամ Մանուկյանին մի քանի անգամ նախազգուշացում կիրառելուց հետո հեռացրեց նրան դատական նիստերի դահլիճից:
Ամբաստանյալ Հովհաննես Հարությունյանը և Թաթուլ Թամրազյանը նույնպես հեռացվեցին դատական նիստերի դահլիճից, քանի որ չէին ցանկանում ներկա գտնվել դատական նիստերին դահլիճում:
Նախորդ դատական նիստում ՊՊԾ գնդի գործով 15 ամբաստանյալներ հեռացվել էին դահլիճից, քանի որ նախագահող դատավորի մտնելու ընթացքում ամբաստանյալները ոտքի չէին կանգնել: Սանկցիան չէր կիրառվել միայն Թաթուլ Թամրազյանի, Հովհաննես Հարությունյանի և Արամ Մանուկյանի նկատմամբ, քանզի վերջիններս վատառողջ էին:
