Մուշի 21 թաղամասերում պարետային ժամ է հայտարարվել
«Քուրդիստանի բանվորական կուսակցության» (ՔԲԿ-PKK) զինյալների դեմ ռազմական գործողություններ սկսելու նպատակով մայիսի 11-ին Թուրքիայի Մուշ քաղաքի 21 թաղամասերում պարետային ժամ է հայտարարվել: Ըստ թուրքական «Doğan» լրատվական գործակալության` օպերացիայի ժամանակ նախատեսվում է ոչնչացնել քուրդ զինյալների զինապահեստները, թաքստոցները: Նշյալ լուրը հաստատել է Մուշի նահանգապետարանը: Վերջինիս հայտարարության մեջ ասվում է, որ դա արվում է՝ բնակիչների անվտանգության նկատառումներից ելնելով: Պարետային ժամը կգործի այնքան ժամանակ, մինչև ծրագրած օպերացիաները չավարտվեն:
Աղբյուրը տեղեկացնում է, որ պարետային ժամ է հայտարարվել նաև Թուրքիայի Դիարբեքիր նահանգի Քուլփ շրջանի 3 գյուղերում (Յայլաք, Ալաջա, Աղաչքորուր): Այնտեղ նույնպես թուրք ուժայինները պատրաստվում են ռազմական գործողություներ իրականացնել ՔԲԿ-ի զինյալների դիրքերի ուղղությամբ: Այդ լուրը ևս հաստատվել է տեղի նահանգապետարանի կողմից:
Հիշեցնենք, որ PKK-ն Թուրքիայում համարվում է ահաբեկչական կազմակերպություն:
