Ֆիյոնը Ֆրանսիայի գլխավոր խնդիրը համարում է ԱՄՆ-ի և ՌԴ-ի միջև հակամարտության կանխումը
Ֆրանսիայի նախկին վարչապետ, երկրի նախագահի թեկնածու Ֆրանսուա Ֆիյոնը France 2 հեռուստաալիքի եթերում հայտարարել է, որ Փարիզը բոլոր ջանքերը կներդնի ԱՄՆ-ի եւ Ռուսաստանի միջեւ հակամարտություն թույլ չտալու համար։
Հեռուստահաղորդավարի այն հարցին, թե ինքն ինչ կասեր ԱՄՆ-ի նախագահ Դոնալդ Թրամփին, եթե հանդիպեր նրան, Ֆիյոնը պատասխանել է.
«Առաջին հերթին ես կասեի, որ Ֆրանսիան անկախ արտաքին քաղաքականություն է վարելու՝ ունենալով միայն մեկ մտահոգություն՝ խուսափել պատերազմից եւ բոլոր ջանքերն ուղղել այն բանին, որ ռազմական դիմակայություն թույլ չտրվի ԱՄՆ-ի եւ ՌԴ-ի միջեւ»:
Ֆիյոնը նաեւ նշել է, որ «ընդհանուր թշնամին իսլամական ամբողջատիրությունն է, որը տարածվել է ԱՄՆ-ի սխալների, հատկապես Իրաքում պատերազմի պատճառով», հաղորդել է ՏԱՍՍ-ը։
