«Աջափնյակի որոշ թաղամասերում երբ մտնում ես շենք, դռների վրա գրված է, որ «մեր ձայնը տալիս ենք Արման Սահակյանին, մեզ չանհանգստացնել»». Արմեն Առաքելյան
«Ի տարբերություն մյուս ընտրությունների՝ քարոզարշավի լուսաբանումը հաճելիորեն տարբերվում էր մյուսներից, մամուլը բավականին համաչափ և օբյեկտիվ մեկնաբանում էր»,- այսօր լրագրողների հետ հանդիպման ժամանակ նման տեսակետ հայտնեց «Ազատ դեմոկրատներ» կուսակցության վարչության անդամ Արմեն Առաքելյանը:
Նա նշեց, որ իրենց քարոզարշավի ժամանակ խոչընդոտներ չեն եղել. «Ի զարմանս ինձ՝ Երևանում էլ կան ֆեոդալական տարածքներ, ինձ թվում էր՝ չպետք է լինի: Աջափնյակի որոշ թաղամասեր գտնվում են այդ վիճակում, երբ մտնում ես շենք, դռների վրա գրված է, որ «մեր ձայնը տալիս ենք Արման Սահակյանին, մեզ չանհանգստացնել», և այլն: Եթե ուզում ես հետները մի բան խոսել, միանգամից մի քանի հոգի հարձակվում են՝ «էստեղ գործ չունեք, ոչ մեկդ բան մի արեք»:
Ա. Առաքելյանի խոսքով՝ այս ընտրարշավի ընթացքում մի քանի ուժեր փորձում են մանիպուլյացիաներ անել. «Մեկը՝ «Ելք» դաշինքը, որի ներկայացուցիչներն անընդհատ փորձում են հասկացնել ժողովրդին, որ իրենք անցել են, իրենք անցողիկ շեմում են, և այն «մյուս ընդդիմադիր կուսակցություններին ձայն մի տվեք, մեզ տվեք, որ անցնենք»:
Մանիպուլյացիա անում է նաև «Ծառուկյան» դաշինքի ներկայացուցիչը, նա էլ մի քիչ ուրիշ ձևով է ասում, ասում է՝ «ընդհանրապես մանր ընդդիմադիր կուսակցություններին ձայն մի տվեք, տվեք մեզ, որ մենք 50 և 1-ը հաղթահարենք և վերցնենք իշխանություն»: Ամենամեծ մանիպուլյացիան Լևոն Տեր-Պետրոսյանի ելույթն էր, որտեղ նա Ղարաբաղի հարցի վերաբերյալ բոլոր կուսակցությունների տեսակետները ներկայացնելուց՝ ընդամենը ներկայացնում էր այն, ինչ իրեն էր պետք: Նա այնպես ներկայացրեց, որ «Ազատ դեմոկրատները» նույնպես համաձայն են իրենց փուլային տարբերակին»:
