Brexit-ի շուրջ բանակցությունները պետք է լինեն հստակ ու կառուցողական. Օլանդ
Ֆրանսիայի նախագահ Ֆրանսուա Օլանդը Մեծ Բրիտանիայի վարչապետ Թերեզա Մեյին հայտարարել է, որ Brexit-ի շուրջ բանակցությունները պետք է լինեն հստակ ու կառուցողական: Այդ մասին ասված է Ֆրանսիայի ղեկավարի վարչակազմի կողմից տարածված հաղորդագրության մեջ:
«Հանրապետության նախագահը հեռախոսային բանակցություններ է վարել Մեծ Բրիտանիայի վարչապետ Թերեզա Մեյի հետ: Մեյը հիշեցրել է, որ Միացյալ Թագավորությունը որոշել է գործարկել ԵՄ-ից դուրս գալու ընթացակարգը: Նամակում, որը մարտի 29-ին ուղարկվել է Եվրախորհրդին, նա ներկայացնում է այն մոտեցումը, որն իր կառավարությունը ցանկանում է որդեգրել հետագա բանակցությունների համար»,-նշվում է Ելիսեյան պալատի հայտարարության մեջ:
«Նա (Օլանդը) տիկին Մեյին հիշեցրել է բանակցությունների սկզբունքները: Դրանք պետք է լինեն հստակ ու կառուցողական՝ խուսափելու համար անորոշություններից եւ պահպանելու Եվրամիության 27 երկրների կանոններն ու շահերը»,-վկայում է
փաստաթուղթը:
Մեծ Բրիտանիայի վարչապետ Թերեզա Մեյը, մարտի 29-ին՝ ելույթ ունենալով բրիտանական խորհրդարանի Համայնքների պալատում, Եվրամիության իշխանություններին ծանուցել է ԵՄ-ի կազմից երկրի դուրս գալու ընթացակարգի պաշտոնական գործարկման մասին:
Մեյը պատմական պահ է համարել Brexit-ի գործարկումը, որը հետդարձի ճանապարհ չունի:
«Սա պատմական պահ է, որը հետդարձի ճանապարհ չունի: Մեծ Բրիտանիան լքում է Եվրամիությունը: Մենք պատրաստվում ենք ընդունել սեփական որոշումներ ու սեփական օրենքներ»,-ասել է նա:
Իրենց հերթին ԵՄ-ի 27 երկրների ղեկավարները խոստացել են միասնական ճակատով գործել Brexitի պայմանների շուրջ Լոնդոնի հետ բանակցություններում, ինչի մասին ասված է ԵՄ-ի մնացած երկրների ղեկավարների՝ մարտի 29-ին հրապարակված հռչակագրում, որը տարածվել է այն բանից հետո, երբ ԵՄ-ում Մեծ Բրիտանիայի մշտական ներկայացուցիչը Եվրախորհրդի ղեկավար Դոնալդ Տուսկին փոխանցեց Brexit-ի գործարկման մասին Լոնդոնի պաշտոնական ծանուցագիրը:
«Մենք ափսոսում ենք, որ Մեծ Բրիտանիան լքում է ԵՄ-ն, բայց մենք պատրաստ ենք առաջիկա գործընթացին»,-նշվում է փաստաթղթում, հաղորդելէ ՌԻԱ Նովոստին:
