«Մենակ փող ունեցողները պիտի հնձե՞ն. հո միջնադարում չե՞նք ապրում». Արթուր Բաղդասարյան

Այսօր Գեղարքունիքի մարզի Մարտունի քաղաքի բնակիչների հետ հանդիպման ժամանակ «Հայկական Վերածնունդ» (նախկին «Օրինաց Երկիր») կուսակցության նախագահ, կուսակցության համամասնական ցուցակը գլխավորող Արթուր Բաղդասարյանը հայտարարեց, որ իրենք ունեն քաղաքական կամք, վճռականություն՝ իրենց նախըտնրական ծրագրի 30 քայլն իրականացնելու համար։

«Մարտունու ճանապարհը ողբերգական վիճակում է, թող էդ փողը տան, այստեղ ասֆալտ անենք, բայց նա քեզ հաշվետու չէ, ասում է՝ փողը տալիս՝ առնում եմ, ախպեր ջան։ Բայց հո աշխարհի վերջը չէ՞։ Էդ 10 հազարը 5 տարում ձեզ ի՞նչ է անելու»,- ասաց նա՝ հավելելով, որ, եթե կարիքից դրդված՝ փող են վերցնում, այնուամենայնիվ թող քվեարկեն իրենց նախընտրած ուժի օգտին։

Բաղդասարյանը նկատեց՝ շատ դեպուտատներ Մարտունիում հեկտարներով հող ունեն, բայց ոչինչ չեն անում, երկրից փողեր են դուրս տանում. «Դրա համար ասում եմ՝ կա փոփոխության հնարավորություն, եթե մի անգամ գնանք՝ ճիշտ քվեարկություն անենք։ Գիտե՞ք՝ ինչ կա՝ եթե մարդը փող չունի, չի նշանակում, որ նա մարդ չէ։ Այս երկրում եթե փող չունես՝ գնա մեռի, դու մարդ չես։ Մենք դատապարտում ենք այս մոտեցումը, մենք լուծում ենք առաջարկում. պետական բյուջեում եղած գումարները ճիշտ ծախսել։ Մենակ փող ունեցողները պիտի հնձե՞ն. հո միջնադարում չե՞նք ապրում»։

«Ես գիտեմ, որ այստեղ զանգվածային ցուցակագրում է տեղի ունենում։ Մենք «ո՛չ» ենք ասում դրան»,- եզրափակեց նա։

Տեսանյութեր

Լրահոս