Պենելոպա Քրուսը Դոնաթելա Վերսաչեին կմարմնավորի «Հանցագործությունների ամերիկյան պատմություն» ֆիլմում. THR
Հոլիվուդի աստղ եւ «Օսկար» մրցանակի դափնեկիր Պենելոպա Քրուսը «Հանցագործությունների ամերիկյան պատմություն» սերիալի նոր եթերաշրջանում խաղալու է մոդելագործ Դոնաթելա Վերսաչեի դերը: Կինոնախագիծը նվիրվելու է Դոնաթելայի եղբոր եւ լեգենդար նորաձեւության տան հիմնադիր Ջանի Վերսաչեի առեղծվածային սպանությանը։ Այդ մասին հայտնել է The Hollywood Reporter հանդեսը:
Ռեժիսոր Ռայան Մերֆիի՝ տասը սերիայից բաղկացած «Վերսաչե. հանցագործությունների ամերիկյան պատմություն» ֆիլմը էկրան կբարձրանա արդեն հաջորդ տարի: Մերֆին «Հանցագործությունների ամերիկյան պատմության» մեկ եթերաշրջան արդեն նկարահանել է մարզիկ եւ դերասան Օ.Ջեյ Սիմփսոնի գործի մասին: Այս նախագիծն Emmy մրցանակի է արժանացել «Լավագույն մինիսերիալ» անվանակարգում:
Այժմ նկարահանումների փուլում է «Քաթրին» փոթորկի հետեւանքների մասին պատմող սերիալի երկրորդ եթերաշրջանը: Երրորդ եթերաշրջանը նվիրվելու է Վերսաչեի ընտանիքի պատմությանը, չորրորդը՝ ԱՄՆ-ի 42-րդ նախագահ Բիլ Քլինթոնի եւ Մոնիկա Լեւինսկու գործին:
1997 թվականին 50-ամյա Ջանի Վերսաչեն՝ Versace նորաձեւության տան հիմնադիրը, որը թողարկում է հագուստ, կոսմետիկա, պարֆյումերիա, ոսկերչական իրեր եւ ինտերիերի առարկաներ, սերիական մարդասպանի կողմից գնդակահարվել է Մայամի-Բիչում (ԱՄՆ-ի Ֆլորիդայի նահանգ) գտնվող սեփական տան շեմին: Մի քանի օր հետո հանցագործը վերջ է տվել իր կյանքին: ԶԼՄ-ները սպանության մեջ մեղադրել են իտալական մաֆիային եւ նույնիսկ Վերսաչեի ընտանիքին:
Նորաձեության տունը դիզայներ Ջանի Վերսաչեի կողմից հիմնադրվել է 1978 թվականին: 1997 թվականին նրա սպանությունից հետո բիզնեսը GIVI Holding ընկերության միջոցով ղեկավարում է Վերսաչե ընտանիքը: Հիմնադրի քույրը՝ Դոնաթելան, GIVI-ի բաժնետոմսերի 20 տոկոսի սեփականատերն է, նրա եղբորը՝ Սանտոյին, պատկանում է 30 տոկոսը, իսկ մնացածը պատկանում է Դոնաթելայի դստերը՝ Ալեգրային, հաղորդել է ՏԱՍՍ-ը:
