Եվրախորհուրդը Brexit-ի վերաբերյալ ռազմավարությունը կներկայացնի Լոնդոնի ծանուցումից 48 ժամ անց
Եվրախորհրդի նախագահը Brexit-ի շուրջ բանակցությունների վերաբերյալ ռազմավարության նախագիծը ԵՄ-ի մնացած երկրներին կներկայացնի Լոնդոնի կողմից ծանուցումն ստանալուց հետո 48 ժամվա ընթացքում: Այդ մասին հայտնել է Եվրախորհրդի նախագահ Դոնալդ Տուսկը:
«Լիսաբոնի պայմանագրի 50-րդ հոդվածի գործարկումից հետո 48 ժամվա ընթանցքում ես ռազմավարության նախագիծը կներկայացնեմ մնացած 27 անդամ երկրներին»,-նշել է նա:
Մարտի 20-ին The Guardian թերթը՝ վկայակոչելով ԵՄ-ում Մեծ Բրիտանիայի մշտական ներկայացուցիչ Թիմոթի Բարոուի արած հայտարարությունը, հայտնել է, որ Մեծ Բրիտանիայի վարչապետ Թերեզա Մեյը ԵՄ-ից Միացյալ Թագավորության դուրս գալու ընթացակարգը կգործարկի մարտի 29-ին:
Մարտի 14-ին Մեծ Բրիտանիայի խորհրդարանը հաստատել էր առանց ուղղումների Brexit-ի գործընթացը գործարկելու փաստաթուղթը: Մարտի 16-ին Brexit-ին վերաբերող օրենսդրությանը պաշտոնապես հավանություն էր տվել Եղիսաբեթ Երկրորդ թագուհին:
2016 թվականի հունիսի 23-ին Մեծ Բրիտանիայում հանրաքվե է անցկվացվել Եվրամիության կազմից երկրի դուրս գալու շուրջ: Պաշտոնական տվյալներով՝ հանրահարցման մասնակիցների 51,9 տոկոսը հանդես է եկել Brexit-ի օգտին, հաղորդել է ՏԱՍՍ-ը:
