«Այս դեպքում Եվրասիական տնտեսական միությանն անդամակցության օգուտն ակնհայտ է». Վաչե Գաբրիելյան

Վերջին երկու տարիները Հայաստանի տնտեսության համար հեշտ ժամանակներ չեն եղել, սակայն տնտեսական դժվարությունները պայմանավորված չեն եղել Եվրասիական տնտեսական միությանը Հայաստանի անդամակցությամբ: Երևանում միջազգային երկխոսության «Վալդայ» ակումբի արտագնա նիստի ընթացքում իր ելույթում այս մասին ասաց Հայաստանի փոխվարչապետ Վաչե Գաբրիելյանը:

«Վերջին երկու տարիների ընթացքում մեր տնտեսության մեջ հետաքրքիր զարգացումներ են եղել: 2015-2016թթ. մեզ համար հեշտ ժամանակներ չէին տնտեսական առումով: Այդ ժամանակահատվածը նաև համընկավ Եվրասիական տնտեսական միությանը Հայաստանի անդամակցության հետ, և մեր հասարակության մեջ շատ էին քննարկում հարցը՝ արդյոք երկրում տնտեսական բարդ իրավիճակի պատճառը Եվրասիական տնտեսական միության անդամակցումն է: Տարբեր գնահատականներ են հնչել, սակայն ամենագլխավորն այն է, որ մենք միշտ փորձել ենք բացատրել, որ մեր երկրի տնտեսության դժվարությունները հարկավոր է բաժանել Եվրասիական տնտեսական միությունում տեղի ունեցող զարգացումներից»,-  նշեց Գաբրիելյանը:

Նա ընդգծեց, որ ՀՀ կառավարությունը վերլուծություններ է իրականացրել, որոնց արդյունքները ցույց են տվել, որ Հայաստանի տնտեսության վրա ավելի բարդ ազդեցություն կունենար Ռուսաստանի բարդ տնտեսական վիճակը, եթե երկիրը չանդամակցեր Եվրասիական տնտեսական միությանը: «Մեզ համար շատ կարևոր նշանակություն ունի կապիտալի, ապրանքների, ծառայությունների և աշխատուժի ազատ տեղաշարժի հնարավորությունը, որ տալիս է Եվրասիական տնտեսական միությունը»,- ասաց փոխվարչապետը:

Վաչե Գաբրիելյանը հիշեցրեց, որ վերջերս Հայաստանում սպառողների համար նվազել է գազի սակագինը՝ ընդգծելով, որ ՀՀ-ն Ռուսաստանից գազ է գնում ավելի էժան գնով, քան այն երկրները, որոնք Եվրասիական տնտեսական միության անդամ չեն: «Այս դեպքում Եվրասիական տնտեսական միությանն անդամակցության օգուտն ակնհայտ է: Այսինքն, այն երկրները, որոնք միության անդամ չեն, Ռուսաստանից գազ են գնում շատ ավելի բարձր գներով, քան Հայաստանը»,- ասաց փոխվարչապետը:

Կարդացեք նաև

Նրա խոսքով՝ ԵԱՏՄ-ին Հայաստանի անդամակցությունից հետո ՌԴ-ից Հայաստան ներմուծման ծավալները զգալիորեն ավելացել են: «Սա նշանակում է, որ հիմա մեր գործարարները ոչ թե երրորդ երկրներից են բերում այս կամ այն ապրանքը, այլ Ռուսաստանից, քանի որ դա ավելի ձեռնտու է: Մենք տեսնում ենք, որ առաջընթաց կա ու մեր բիզնեսի համար հեշտացել է առևտուրը Եվրասիական տնտեսական միության անդամ երկրների հետ»,- ասաց Վաչե Գաբրիելյանը:

Նրա գնահատմամբ՝ եվրասիական ինտեգրացիոն նախագիծը շատ մեծ հեռանկարներ ունի, որն արդեն իսկ հասցրել է որոշակի հաջողություններ արձանագրել: Եզրափակելով խոսքը՝ Վաչե Գաբրիելյանն ընդգծեց, որ Հայաստանը կարող է երկխոսության ու տնտեսական համագործակցության հարթակ դառնալ Եվրոպական Միության և Եվրասիական տնտեսական միության միջև:

Տեսանյութեր

Լրահոս