«Թշնամին անընդհատ հրետակոծում էր մեր զորամասի տարածքը. այն գտնվում էր ուղիղ նշանառության տակ»

Գեղարքունիքի մարզի Ձորագյուղ գյուղի բնակիչ, Հայոց բանակի արդեն նախկին զինծառայող, 2016 թվականի Ապրիլյան հերոսամարտերի մասնակից Հարություն Մովսիսյանը զորացրվել եւ տուն է վերադարձել պետական պարգեւով՝ «Անդրանիկ Օզանյան» մեդալով:

Ինչպես «Արմենպրես»-ին տեղեկացրեց Ձորագյուղի գյուղապետ Լեւիկ Գրիգորյանը, Հարություն Մովսիսյանն իր եղբայր Գարիկի հետ միասին Մարտակերտի ուղղությամբ տեղակայված զորամասի կազմում մասնակցել է ապրիլյան հերոսամարտերին, եւ նրանց ծնողներն անսահման երջանիկ են, որ իրենց որդիները ոչ միայն ողջ ու առողջ են դուրս եկել պատերազմական գործողություններից, այլ նաեւ նրանցից մեկը տուն է վերադարձել պետական պարգեւի արժանացած:

Հարությունի եւ Գարիկի հայրը՝ Հայկ Մովսիսյանը, ասաց. «Բառերով դժվար է նկարագրել, թե մեր ընտանիքով ու հարազատներով ինչ ապրումների մեջ էինք ապրիլի առաջին օրերի ընթացքում: Մենք ընդամենը այս երկու տղաներն ունենք, ովքեր այդ ծանր օրերին միասին գտնվում էին պատերազմի մեջ: Մեր հույսը մնացել էր միայն Աստծուն: Հպարտ եւ ուրախ եմ, որ ավագ որդիս ողջ ու հերոսացած տուն դարձավ եւ հավատում եմ, որ նույն կերպ էլ կրտսեր տղայիս կդիմավորեմ մեկ տարի հետո»,- ասաց Հայկ Մովսիսյանը:

Ապրիլյան հերոսամարտերից առած դասերի եւ նշանակության, Հայոց բանակի մարտունակության, իր հրամանատարների սխրալի կերպարների, ապագա անելիքների մասին «Արմենպրես»-ի հետ կիսվեց Հարություն Մովսիսյանը:

«Երբ սկսվեցին պատերազմական գործողությունները, ես մարտական հատուկ հանձնարարություն ստացա՝ պահպանել մեր գնդի դրոշը: Թշնամին անընդհատ հրետակոծում էր մեր զորամասի տարածքը, որն անօդաչու թռչող սարքերի կողմից հայտնաբերվել էր եւ գտնվում էր ուղիղ նշանառության տակ: Կարճ ժամանակի ընթացքում մեր զորամասի ողջ անձնակազմը դիրքավորվեց թշնամուն արդեն անտեսանելի տեղում, եւ նա ստիպված աննպատակ հրետակոծում էր միայն շինություններն ու զորամասի դատարկ տարածքը:

Գնդի դրոշը տեղափոխել ենք Ներքին Հոռաթաղ գյուղ, որտեղ էլ կազմակերպել ենք նրա ուժեղացված պահպանությունը: Դիմակայել ենք թշնամու կրակահերթերն ու հարձակումները՝ տալով համարժեք պատասխան նրա յուրաքանչյուր գործողության դիմաց: Բարեբախտաբար, մեր զորամասը շատ կորուստներ չտվեց, բացի նրանից, որ տարածքի ականապատման ժամանակ ականի պայթյունից մեր ծառայակից Նորայր Զախարյանը կորցրեց ոտքը: Իսկ ես պետական պարգեւի արժանացել եմ հատուկ մեր դրոշի պահպանության հանձնարարությունն անթերի կատարելու համար»,- ներկայացրեց Հարություն Մովսիսյանը:

Նա խոսեց նաև ապրիլյան հերոսամարտերի հաղթանակը կռած իր հրամանատարների մասին: «Անկեղծ ասած, մինչ ապրիլյան հերոսամարտերը մենք մեր հրամանատարներին հարգում էինք որպես սովարական մարդկանց ու հրամանատարների՝ ըստ արժանվույն չգնահատելով նրանց դերն Արցախն ազատագրելու գործում: Ապրիլյան հերոսամարտի ընթացքում մենք հասկացանք, թե մեր հրամանատարների համար ինչպիսի նշանակություն ունի ազատագրված յուրաքանչյուր թիզ հողի պաշտպանությունը, թե ինչ քաջ ու հայրենասեր մարդիկ են նրանք՝ մեծարանքի արժանի: Մենք էլ մեզ հպարտ ենք զգում, որ այդ ծանր օրերին եղել ենք նրանց կողքին, հայրենիքի պաշտպանության դիրքերում: Եղբորս տեսակցելու նպատակով հաճախակի կլինեմ մեր զորամասում, կտեսակցեմ նաեւ հրամանատարներիս ու ծառայակիցներիս, կշարունակեմ ուսումս Երեւանի ճարտարագիտական համալսարանում, այսուհետ հայրենիքիս ու ծնողներիս կծառայեմ խաղաղ աշխատանքում: Բայց եթե, Աստված չանի, թշնամին նորից փորձի պատերազմ սկսել, ես կամավոր կգնամ իմ զորամաս եւ կգլխավորեմ մեր հրա ձգային դասակի իմ ջոկը, որ վստահված էր ինձ»,- նշեց Հարությունը:

Ձորագյուղի գյուղապետ Լեւիկ Գրիգորյանի հավաստմամբ՝ այս պահի դրությամբ Հայոց բանակի շարքերում ծառայում են 63 ձորագյուղցիներ:2016 թվականի ամառային զորակոչի ընթացքում Ձորագյուղից հայոց բանակ են զորակոչվել 11 նորակոչիկ, զորացրվել եւ տուն են վերադարձել 9 ժամկետային զինծառայող:»Գյուղապետարանի կողմից դրամական խրախուսանքի են արժանանում սոցիալապես անապահով եւ ծնողազուրկ երեխաները: Հարությունը սոցիալապես անապահով ընտանիքից է, ով եւս արժանացել է նաեւ մեր դրամական խրախուսանքին»,- ասաց համայնքի ղեկավարը

Խոսրով Խլղաթյան