Կայացավ «Հյուսիս-Հարավ» ֆիլմի պրեմիերան
Այսօր «Մոսկվա» կինոթատրոնում լրագրողների և դերասանական անձնակազմի համար կայացավ ռեժիսոր Դավիթ Բաբախանյանի «Հյուսիս-Հարավ» ֆիլմի պրեմիերան: Ֆիլմի բյուջեն կազմել է 400 հազար դոլար: Ֆիլմի առաջին ցուցադրությունը հանդիսատեսի համար կկայանա արդեն երեկոյան: Ցուցադրումից անմիջապես հետո կայացավ մամլո ասուլիս, որը սկսվեց գլխավոր պրոդյուսեր` Կարեն Ղազարյանի շնորհակալական խոսքով.
«Իհարկե, սա կոմեդիա է: Ֆիլմ է` ժամանակ անցկացնելու համար: Բացի բարի էներգիայից, որը մենք փորձել ենք այս ֆիլմի միջոցով փոխանցել հանդիսատեսին, որևէ այլ մեծ գաղափար այն չի կրում: Երբեմն «Շարմին» մեղադրում են, որ միայն կոմեդիաներ ենք նկարահանում, բայց դա այդպես չէ: Դրա ամենավառ օրինակն է` «Անավարտ թռիչքը» դրաման: Բացի այդ, նոր ֆիլմեր ենք պատրաստում: Տարվա վերջին կլինի Կոմիտասի մասին պատմող Վիգեն Չալդրանյանի` «Վարդապետի լռությունը» ֆիլմի պրեմիերան: Պատրաստվում է մի ֆիլմ ևս, որ կոչվում է «Վերադարձ»` նվիրված Ցեղասպանության 100-ամյակին: Մի խոսքով, բազմաթիվ ֆիլմեր կան, որոնք մենք պատրաստվում ենք ներկայացնել ձեզ, բայց մենք չենք դավաճանում մեր սկզբունքին և նկարահանում ենք նաև կոմեդիաներ: Մեր կյանքն այնքան տխուր է այսօր և այնքան շատ խնդիրներ կան կյանքում, որ անպայման պետք են այսպիսի ֆիլմեր, որ կարողանանք լիցքաթափվել»,- ասաց Կ. Ղազարյանը:
Ֆիլմում նկարահանված բոլոր դերասաններն արդեն իսկ ունեին դերասանական փորձ, բացի երգչուհի Սոնա Շահգելդյանից, որի, ինչպես ֆիլմի հերոսներից մեկն է նշում` տղամարդ-կնոջ կերպարը՝ ֆիլմում ամենաստացվածներից մեկն էր:
«Կարծում եմ, որ երգչուհի լինելով հանդերձ, կարողացա դերասանական ինչ-որ մի ջիղ մտցնել ֆիլմի մեջ: Ես գոհ եմ իմ աշխատանքից և հպարտ եմ, որ աշխատել եմ այսպիսի մարդկանց հետ»,- նշեց Սոնան:
«Հյուսիս-Հարավ» ֆիլմն, ըստ էության, քաղաքային ռոմանս է`4 ընկերների մասին: Կրտսեր գիտաշխատող Նվերը, մասնագիտական պատվեր ստանալով ռուս մեծահարուստ Լամբերտ Խաչատուրովիչից, որոշում է օգտվել առիթից և ընկերների համար երեկույթ կազմակերպել պատվիրատուի շքեզ առանձնատանը: Չափից դուրս աշխուժության արդյունքում ջարդվում է Լամբերտ Խաչատուրովիչի հոր արձանը: Հաշվի առնելով վերջինիս վերաբերմունքը հոր հիշատակին` ընկերները հեշտությամբ պատկերացնում են Նվերի վախճանը…
Տղաները մոգոնում են «փրկության ծրագիրը», սակայն «ունքն ուղղելու փոխարեն» աչքն էլ են հանում: Այժմ նրանք ոչ միայն պետք է արձանի գումարը վճարեն, այլև` կազմակերպեն շքեղ հարսանիք, որի համար ստացած կանխավճարն այլևս չկա…
Այս ֆիլմում հայկական կինոարտադրության մեջ առաջին անգամ ընդգրկվել են մեծածավալ անիմացիոն դրվագներ:
Ֆիլմի ռեժիսորը Դավիթ Բաբախանյանն է, սցենարի հեղինակը` Աշոտ Աբրահամյանը, բեմադրող օպերատորը Վազգեն Մուրադյանն է, պրոդյուսերը` Արման Միտոյանը, գլխավոր պրոդյուսերը` Կարեն Ղազարյանը:
