Նոր մանրամասներ Բաղրամյան գյուղում երեխաների թունավորման դեպքից
Արարատի մարզի Բաղրամյան գյուղի դպրոցից Արտաշատի բժշկական կենտրոն տեղափոխված երեխաների վիճակը բավարար է, հնարավոր է՝ նրանց մեծ մասն այսօր դուրս գրվի հիվանդանոցից: Այս մասին 168.am-ի հետ զրույցում հայտնեցին «Արտաշատի բժշկական կենտրոնից»՝ նշելով, որ նախնական տվյալներով երեխաների մոտ սննդային թունավորում է, նրանք այժմ կաթիլային ներարկում են ստանում:
Կենտրոնից մեզ փոխանցեցին, որ երեխաները հիմնականում նշում են, որ հաց ու երշիկ, հաց ու կարտոֆիլ են կերել: Բժշկական կենտրոնից մեզ հայտնեցին նաև, որ ընդունվելիս երեխաները սրտխառնոց, գլխացավ են ունեցել, մի մասը՝ նաև գլխապտույտ ու հևոց:
Նշենք, որ ՀՀ տարածքային կառավարման և արտակարգ իրավիճակների նախարարությունը հաղորդագրություն էր տարածել այն մասին, որ սեպտեմբերի 10-ին, ժամը 13:17-ին տեղեկատվություն է ստացվել, որ Արարատի մարզի Բաղրամյան գյուղի դպրոցի 5-րդ դասարանի 20 երեխա թունավորման նախանշաններով տեղափոխվել է Արտաշատի ԲԿ:
