Վրաստանի, Թուրքիայի ու Ադրբեջանի եռակողմ համագործակցությունը ստեղծում է զարգացման նոր հնարավորություններ. Գարիբաշվիլի
Грузия Online-ի փոխանցմամբ` Վրաստանի, Ադրբեջանի ու Թուրքիայի պաշտպանության նախարարները երեկ Թբիլիսիում հանդիպել են Վրաստանի վարչապետ Իրակլի Գարիբաշվիլու հետ:
Հանդիպման ժամանակ Գարիբաշվիլին գոհունակություն է հայտնել Վրաստանի, Ադրբեջանի ու Թուրքիայի միջև հարաբերությունների զարգացման կապակցությամբ: Նա բարձր է գնահատել երեք երկրների տարբեր կառույցների ղեկավարների միջև նմանատիպ հանդիպումները:
Գարիբաշվիլու խոսքերով` նման միջոցառումները նոր հնարավորություններ են բացում երեք երկրների միջև քաղաքական, տնտեսական ու մշակութային կապերի զարգացման համար:
Հանդիպման ժամանակ քննարկվել են փոխադարձ հետաքրքրության կենտրոնում ընկած հարցեր: Հանդիպմանը ներկա են գտնվել նաև Վրաստանում Թուրքիայի ու Ադրբեջանի դեսպանները:
