
Աբխազիայի խորհրդարանը վավերացրել է Ռուսաստանի հետ դաշնակցային պայմանագիրը

Ռուսական ТАСС լրատվական գործակալության փոխանցմամբ՝ Աբխազիայի խորհրդարանն այսօր վավերացրել է Ռուսաստանի հետ դաշնակցության ու ռազմավարական գործընկերության մասին պայմանագիրը, որը ստորագրվել է նոյեմբերի 24-ին Սոչիում:
Ավելի վաղ Աբխազիայի նախագահ Ռաուլ Խաջիմբան հայտարարել էր, որ Ռուսաստանի հետ այդ պայմանագիրն ուղղված է երկկողմ հարաբերություններին նոր ազդակ հաղորդելուն և կօգնի լուծել անվտանգության խնդիրը, ընդլայնել Աբխազիայի անկախության հետագա միջազգային ճանաչումը:
Խաջիմբան փաստաթուղթը խորհրդարանին ներկայացրել էր դեկտեմբերի 8-ին: Դրա օգտին քվեարկել է 28 պատգամավորներից 23-ը, մնացյալ հինգը դեմ են քվեարկել: Նոր պայմանագիրը նախատեսում է, որ Ռուսաստանն ամեն կերպ նպաստելու է Աբխազիայի միջազգային կապերի ընդլայնմանը, ներառյալ նաև նրա միջազգային ճանաչմանը:
Բացի այդ, նախատեսվում է ստեղծել համատեղ զորքեր, ինչպես նաև նշված է, որ եթե կողմերից մեկը զինված ագրեսիայի ենթարկվի մեկ կամ մի քանի երկրների կողմից, ապա դա կդիտարկվի նաև ագրեսիայի պայմանագրի մյուս կողմի հանդեպ: Փաստաթղթի համաձայն՝ ռուս-աբխազական սահմանի ինժեներա-տեխնիկական հագեցվածությունը պլանավորվում է ավարտել երկու տարվա ընթացքում: