Թուրքիան կանգնած չէ ԵՄ-ի ու ՌԴ-ի միջև ընտրություն կատարելու առջև. Թաներ Յըլդըզ
Թուրքական Yeni Şafak թերթի փոխանցմամբ՝ Թուրքիայի էներգետիկայի ու բնական պաշարների նախարար Թաներ Յըլդըզը Ստամբուլում լրագրողների հետ զրույցում հայտարարել է, որ Թուրքիան կանգնած չէ ԵՄ-ի ու Ռուսաստանի միջև ընտրություն կատարելու առջև.
«Թուրքիան ընտրություն չի կատարելու ԵՄ-ի ու ՌԴ-ի միջև: Մենք նախագծերը զարգացնում ենք՝ հաշվի առնելով սեփական ու փոխադարձ շահերը: Որպես Ռուս-թուրքական տնտեսական խառը հանձնաժողովի համանախագահ՝ կարող եմ ասել, որ Թուրքիան ձգտում է մեծացնել գյուղատնտեսական արտադրանքի արտահանումը:
Մեզ համար Ռուսաստանն ավելին է, քան՝ պարզապես հարևան երկրներից մեկը: Թուրքիան չի մնացել Ռուսաստանի ու ԵՄ-ի արանքում: Թուրքիան խնդիրներ չի տեսնում Ռուսաստանի հետ համատեղ նախագծեր իրագործելու համար: Դա մասնավորապես վերաբերվում է Աքքույուի ատոմակայանի ու նոր գազատարի կառուցմանը»:
