ՀՀԿ-ն բացառում է արտահերթ իշխանափոխությունը
Հարցազրույց Ազգային ժողովի փոխնախագահ, Հանրապետական կուսակցության
մամուլի խոսնակ Էդուարդ Շարմազանովի հետ
– Պարոն Շարմազանով, ինչպե՞ս եք գնահատում ԱԺ ԲՀԿ խմբակցության քարտուղար Նաիրա Զոհրաբյանի հայտարարությունն այն մասին, որ «այս իշխանությունը պիտի հեռանա», հաշվի առնելով այն հանգամանքը, որ նախկինում «Բարգավաճ Հայաստանի» հռետորաբանությունը մի փոքր այլ էր, և ԲՀԿ-ն հստակորեն չէր խոսում իշխանափոխության մասին:
– Նախ, «ԲՀԿ-ի հռետորաբանություն» ասելով` ես բացառապես և առաջին հերթին` ի նկատի ունեմ իրենց ղեկավարին, իսկ որքան իմ հիշողությունն ինձ չի դավաճանում, իրենց ղեկավարն ասել է, որ «Բարգավաճ Հայաստանը» չի կարող լինել ընդդիմադիր ուժ: Երկրորդը, ինչ վերաբերում է Ձեր նշած տիկնոջ հայտարարությանը, ապա դա կին քաղաքական գործչի էմոցիոնալ պոռթկում է, որը մեկնաբանելու կարիք չեմ զգում:
Ավելին, կարծում եմ` նման գնահատականներն ունեն ճշտման կարիք հենց իրենց կուսակցության մեջ, որովհետև ես էլ Ձեզ կարող եմ ներկայացնել բարգավաճական պատգամավորների արտահայտություններ, որոնք էականորեն տարբերվում են Ձեր նշած գործչի հայտարարություններից: Ուստի, մի քիչ դժվար է ճշտել, թե դրանցից որն է ԲՀԿ-ի պաշտոնական դիրքորոշումը:
– Բայց կարծում եք` Նաիրա Զոհրաբյանը չէ՞ր համաձայնեցնի այդպիսի կարևոր հայտարարությունը կուսակցության ղեկավարության հետ:
– Ես երբեք չեմ ունեցել նման գործելաոճ, որ քննարկեմ այլ քաղաքական ուժերի ներքին խնդիրները: Դա բացառապես իրենց ներքին խնդիրն է: Ինձ չի հետաքրքրում` ինքը համաձայնեցրե՞լ է, թե՞ ոչ: Ես ասացի այն, ինչ ասացի: Երբ իրենց կուսակցության նախագահը հայտարարի, որ իրենց նպատակն իշխանափոխությունն է, և այս իշխանությունը պետք է հեռանա, այն ժամանակ, ես` որպես ԱԺ փոխնախագահ և ՀՀԿ խոսնակ, հանդես կգամ պաշտոնական հայտարարությամբ, որովհետև ես չեմ մեկնաբանի Գուրգեն Արսենյանի ասածը, ով նշում էր, որ արտահերթ զարգացումներ չպետք է լինեն, այլ պետք է լինեն հերթական ընտրություններ, չեմ մեկնաբանի Ստեփան Մարգարյանի ասածը, որը մի քիչ տարբերվում էր, քան Նաիրա Զոհրաբյանի ասածները:
ԲՀԿ-ն նախևառաջ պիտի հայտարարի` ինքն ընդդիմությո՞ւն է, թե՞ ընդդիմություն չէ: Երբ իրենք հայտարարեն, որ իրենք ընդդիմություն են, այլ ոչ թե այլընտրանք, այն ժամանակ կիմանանք` ընդդիմությա՞ն հետ գործ ունենք, այլընտրանքի՞, թե՞ ընդդիմության հետ, որը մինչև ժամը մեկն ընդդիմություն է, մեկից մինչև հինգը` այլընտրանք, հինգից հետո էլ…
– Իսկ ընդհանուր առմամբ եռյակի մասին ի՞նչ կասեք: Օրինակ, «Ժառանգության» փոխնախագահ Արմեն Մարտիրոսյանն օրերս հայտարարեց, որ ժողովուրդն ինքն է պահանջում իշխանափոխություն, այսինքն` այդպիսի մթնոլորտ է տիրում:
– Արմեն Մարտիրոսյանի հետ աշխատել եմ ԱԺ-ում, կարող եմ ասել, որ կոռեկտ գործչի տպավորություն է թողել, բայց պետք է ավելացնեմ, որ իմ գործընկերը հուսախաբության մեջ է: Նախ, ի՞նչ է նշանակում` ժողովուրդը պահանջում է: Ո՞վ է ժողովուրդը, երեք միլիոնի կարծիքը հարցրե՞լ են: Եվ երկրորդը` ես համամիտ եմ այն կարծիքի հետ, որ չի կարելի ժողովրդի անվան տակ թաքնվել և ասել` ժողովուրդը պահանջում է: Դա պարզ մանիպուլյացիա է: Զարուհի Փոստանջյանը, Ստեփան Սաֆարյանը, Ալեքսանդր Արզումանյանը ժողովուրդ չե՞ն, որ չեն մասնակցում իրենց հանրահավաքին:
– Խոսքն այն մասին է, որ եռյակի անդամներն ասում են` իրենք մարզերում հանդիպել են մարդկանց հետ, և ամենուր նույն տրամադրություններն են:
– Մարզերում, բնականաբար, հանդիպել են իրենց գործընկերի, աջակիցների հետ: Կարծում եմ` Արմենը և նաև նրան թև ու թիկունք տվող և նրա կողքին հարթակին կանգնող գործիչները պետք է լավ իմանան, որ ժողովրդի կարծիքը երևում է ընտրությունների ժամանակ: Ընտրությունները եղել են, և ընտրությունների ժամանակ տեսել ենք` ինչ է ուզում ժողովուրդը: Եվ խորհուրդ կտայի իմ գործընկերներին զերծ մնալ ժողովրդի անունից հայտարարություններ անելուց: Կամ` աբսուրդային գնահատական է` «գնանք հրապարակ, ժողովուրդն ինչ կասի` էդ էլ կլինի»: Անլուրջ է:
Քաղաքական ուժն ինքը պիտի օրակարգ ձևավորի, ինքը պիտի հայտարարի, ժողովրդին ներկայացնի օրակարգ: Բա դու ինչի՞ համար ես քաղաքական էլիտա: Եթե գնաս հրապարակ, ժողովուրդն ասի` կուսակցությունդ ցրի և գնա պաշտպանի Հանրապետականին, կամ բոլորդ մի մարդու նման մտեք Հանրապետականի կազմի մեջ, իրենք պիտի մտնե՞ն: Եթե ժողովուրդն ասի` մենք առաջարկում ենք Ղարաբաղը հանձնել, պիտի անե՞ն դա: Միշտ էլ քաղաքական ուժն է իր ետևից տանում հասարակությանը:
Ինչ վերաբերում է իշխանափոխության կոչերին, ես դրան շատ հանգիստ եմ վերաբերվում, որովհետև առաջին անգամ չէ, որ ընդդիմությունը հանրահավաքների ժամանակ արտահայտում է իր, նաև ժողովրդի մի հատվածի կարծիքը: Իհարկե, կարող են նաև իշխանափոխություն պահանջել, դա մարդկանց իրավունքն է` ցույցերի, երթերի, հանրահավաքների միջոցով արտահայտել իրենց կարծիքը: Ե՛վ իշխանությունը, և՛ մեր Սահմանադրությունը տալիս է այդ հնարավորությունը, որպեսզի մարդիկ օրենքի շրջանակներում ներկայացնեն իրենց բողոքը:
Իսկ ո՞վ է ասել, որ մեր երկրում բոլորն իշխանություններից գոհ պիտի լինեն կամ բոլորը գոհ են: Բնական է, որ այդպես պետք է լինի. ընդդիմությունը քննադատելու համար է, իշխանությունը` աշխատելու:
– Ի՞նչը և ընդդիմության ինչպիսի՞ գործողությունները կարող են ստիպել իշխանությանը հեռանալ, եթե հարցը քննարկենք նաև հոկտեմբերի 10-ին ընդառաջ:
– Կարծում եմ` իշխանության հեռացումն արհեստական օրակարգ է` արհեստականորեն հրապարակ նետված: Ո՛չ նման անհրաժեշտություն կա, ո՛չ էլ նման օրենսդրական, քաղաքական ու տնտեսական պահանջ կա: Իշխանությունն ընտրվել է, և Հայաստանի Հանրապետությունում գործընթացները պիտի գնան բացառապես քաղաքական հունով: Իսկ քաղաքական հունը հետևյալն է, որ կա ընտրությունների փուլ. 2017-ին խորհրդարանական նոր ընտրություններ են լինելու, և 2017-ին նույն ժողովուրդն իր ձայնով կորոշի` ով է լինելու իշխանություն, ով է լինելու ընդդիմություն: Եվ իշխանությունների հեռանալու մասին լուրերը, ինչպես կասեր Մարկ Տվենը, փոքր-ինչ չափազանցված են: «Փոքր ինչ»-ը հումորով եմ ասում. շատ չափազանցված են:
– Այսինքն` Դուք բացառո՞ւմ եք արտահերթ իշխանափոխություն մինչև 2017-18 թթ.: Ես Ձեզ ճի՞շտ հասկացա:
– Լիովին ճիշտ հասկացաք:
