Ադրբեջանը թույլ չի տա, որ երրորդ երկրները վնասեն հարևանների հետ իր հարաբերությունները. Աբդուլաև
Ադրբեջանական Trend լրատվական գործակալության փոխանցմամբ՝ Ադրբեջանի ԱԳՆ-ի պաշտոնական ներկայացուցիչ Էլման Աբդուլաևը մեկնաբանել է մի շարք ԶԼՄ-ների տարածած այն տեղեկատվությունը, թե օգոստոսի 23-ին Իրանում կործանված իսրայելական արտադրության Hermes-450 անօդաչու թռչող սարքը (ԱԹՍ) արձակվել է Ադրբեջանի տարածքից.
«Դա չի համապատասխանում իրականությանը: Ադրբեջանը թույլ չի տա, որ երրորդ երկրները վնաս հասցնեն հարևանների հետ իր հարաբերություններին: Բաքուն բարիդրացիական հարաբերություններ հաստատելիս առաջնորդվում է տվյալ սկզբունքով»:
Սրանից առաջ էլ Ադրբեջանի ՊՆ-ի մամլո ծառայության ղեկավար, գնդապետ Վագիֆ Դարգյահլին հերքել էր այդ տեղեկությունը՝ դա որակելով որպես սադրանք՝ ուղղված հարևան երկրների հետ Ադրբեջանի հարաբերությունների վատթարացմանը:
