Ամենայն Հայոց Կաթողիկոսն ընդունեց Մայր Աթոռ Սուրբ Էջմիածնի միաբանների համագումարի մասնակիցներին
Հունիսի 18-ին Մայր Աթոռ Սուրբ Էջմիածնում իր աշխատանքը կսկսի Մայր Աթոռ Սուրբ Էջմիածնի միաբանների վեցերորդ համագումարը:
Հունիսի 16-ին «Վաչե և Թամար Մանուկյան» Մատենադարանում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց համագումարի առիթով Մայր Աթոռ ժամանած միաբաններին:
Տերունական աղոթքից հետո համագումարի կազմակերպիչ հանձնախմբի ատենապետ Տ. Կոմիտաս վարդապետ Հովնանյանը որդիական երախտագիտություն հայտնեց Վեհափառ Հայրապետին Մայր Աթոռում միաբանության համախմբման այս հնարավորության համար: Հայր Սուրբն ընդգծեց, որ Հայոց Եղեռնի 100-րդ տարելիցին ընդառաջ այս հավաքն առիթ պիտի լինի խոկման, միաբանական ծառայական ուխտի նորոգության և հոգևոր առաքելության արժևորման ու իմաստավորման համար: Մայր Աթոռի միաբանների անունից Հայր Կոմիտասը վերահաստատեց Սուրբ Էջմիածնի հանդեպ միաբանների հավատարմությունը և Ամենայն Հայոց Հայրապետին զինակցության ուխտը` վստահեցնելով, որ իրենց ծառայությամբ ամենքը պիտի շարունակեն մնալ նվիրյալ մշակները հայոց ազգի, Հայրենիքի և Մայր Աթոռ Ս. Էջմիածնի:
Այնուհետև ներկաներին Հայրապետական իր պատգամն ու օրհնությունը բերեց Ամենայն Հայոց Կաթողիկոսը: Գնահատանք հայտնելով միաբաններին Մայր Աթոռի հանդեպ իրենց հավատարմության և հավատավոր ժողովրդին ամբողջանվեր ծառայության համար` Գարեգին Բ Կաթողիկոսը հաստատեց, որ միաբանության ստվարացող շարքերը ոչ միայն Հայոց Հայրապետին են ուրախություն և մխիթարություն պարգևում, այլև հավատ և հույս են ներշնչում հավատավոր հայ ժողովրդին Եկեղեցու վաղվա լուսավոր օրվա նկատմամբ: Նորին Սրբությունը ողջունեց նաև Մեծի Տանն Կիլիկիո Կաթողիկոսության և Կոստանդնուպոլսի Հայոց Պատրիարքության ներկայացուցիչների մասնակցությունը ժողովին:
Իր խոսքում Հայոց Հովվապետը գոհունակությամբ նշեց, որ ավանդաբար` երկու տարին մեկ Մայր Աթոռում գումարվող միաբանական հավաքը գեղեցիկ առիթ է միաբանական ուխտի նորոգության, սիրո և փոխգործակցության ոգու զորացման, կրտսեր միաբաններին հովվական փորձառություն փոխանցելու, ինչպես նաև ազգային-եկեղեցական կյանքը հուզող տարբեր խնդիրներ քննարկելու համար:
Ամենայն Հայոց Կաթողիկոսը գնահատանքով արձանագրեց, որ շնորհիվ Եկեղեցու հոգևոր սպասավորների և ժողովրդի բարեպաշտ զավակների ծառայանվիրումի և համատեղ աշխատանքի Եկեղեցին պայծառանում է և տարեց տարի ավելանում է եկեղեցական-հոգևոր կյանքի մեջ ներգրավվող հայորդիների թիվը: Միաժամանակ Նորին Սրբությունը նաև ցավով նշեց, որ այդ ճանապարհին երբեմն նկատվում են եկեղեցականությանն ու Եկեղեցու հետևորդներին անհանգստացնող անցանկալի ու ավերիչ երևույթներ, և հորդորեց եկեղեցականներին ամեն ջանք ի գործ դնել և նախանձախնդիր, օրինակելի ծառայությամբ ավելիով ջանալ ժողովրդին հեռու պահել կործանարար ընթացքներից, համախմբել հայրերի ճշմարիտ հավատի և ազգային արժեքների շուրջ:
Գարեգին Բ Ամենայն Հայոց Կաթողիկոսը մաղթեց, որ առաջիկա համագումարին յուրաքանչյուր միաբան հնարավորություն ունենա անդրադարձ կատարելու իր ծառայական կոչմանը և հավաքը դառնա հոգևոր նորոգության, ինքնաքննության գեղեցիկ առիթ:
Նույն օրը միաբանությունը Ս. Հռիփսիմե վանքում ներկա գտնվեց Ս. Հռիփսիմյանց տոնի առիթով մատուցված Սուրբ և Անմահ Պատարագին:
