Ուկրաինայի նախագահի թեկնածու Ցարևին ծեծի են ենթարկել
Ռուսական ИТАР-ТАСС լրատվական գործակալության փոխանցմամբ՝ Ուկրաինայի նախագահի թեկնածու, պատգամավոր Օլեգ Ցարևը հայտարարել է, որ մտադիր չէ հրաժարվել նախագահական ընտրություններին մասնակցելուց՝ չնայած իր հետ ֆիզիկական հաշվեհարդար տեսնելու մասին սպառնալիքներին:
Ցարևն ընդգծել է, որ իշխանությունների ու երկրի բոլոր բնակիչների միջև խաղաղ երկխոսությունը, փոխզիջումների ու ըմբռնումների որոնումը միակ ելքն են՝ լուծելու համար առկա քաղաքական ճգնաժամը և պահպանելու համար ուկրաինական պետության ամբողջականությունը:
Նշվում է, որ ICTV հեռուստաալիքի շրջափակված շենքում մի քանի ժամ մնալուց հետո Ցարևը դուրս է եկել փողոց, ուր նրան ծեծի են ենթարկել ագրեսիվ տրամադրված ակտիվիստները: Դրանից հետո դեպքի վայր էր ժամանել տեղի ոստիկանությունը և նրան տեղափոխել էր Անվտանգության ծառայության շենք:
