Կողոպտիչը անսթափ վիճակում վիճաբանել է գովազդի պատրաստման տաղավարի սեփականատիրոջ հետ

Մարտի 26-ին, ժամը 10.20-ին, ոստիկանության Արմավիրի բաժնի ծառայողները Արմավիր քաղաքի Ջիվանու փողոցի 11 շենքի մի բնակարանից, կողոպուտ կատարելու կասկածանքով, բերման են ենթարկել 1975 թ. ծնված Հմայակ Մ.-ին:

Ոստիկանները պարզել են, որ նա մարտի 22-ի երեկոյան, ժամը 20.00-ի սահմաններում, անսթափ վիճակում այցելելով Արմավիրի Սայաթ-Նովայի փողոցում գտնվող գովազդի պատրաստման տաղավար, անհիմն վիճաբանել է սեփականատիրոջ հետ, քաշքշել նրան, այնուհետև բացահայտ հափշտակելով սեղանին դրված բջջային հեռախոսը` դիմել է փախուստի:

Հանցագործության մասին տուժողը ոստիկանություն չէր դիմել: Նրանից ընդունվել է հաղորդում:

Ձեռնարկվում են միջոցառումներ հեռախոսը հայտնաբերելու ուղղությամբ:
Նախապատրաստված նյութերն ուղարկվել են ոստիկանության Արմավիրի քննչական բաժին:

ՀՀ Ոստիկանություն