Ղազախստանն այս տարի Ռուսաստանից կստանա C-300 զենիթա-հրթիռային համալիրներ
Ռուսական РИА Новости լրատվական գործակալության փոխանցմամբ՝ Ռուսաստանն այս տարի Ղազախստանին կհատկացնի C-300 զենիթա-հրթիռային համալիրներ: Այս մասին Ղազախստանի պաշտպանության նախարար Ադիլբեկ Ջակսիբեկովի հետ հանդիպումից հետո հայտարարել է Ռուսաստանի պաշտպանության նախարար Սերգեյ Շոյգուն:
Վերջինիս խոսքերով՝ ղազախական կողմը կստանա բավականաչափ համալիներ՝ իր օդային տիրույթի պաշտպանությունն ապահովելու համար: Շոյգուն չի մանրամասնել, թե կոնկրետ որքան C-300 համալիր է ստանալու Ղազախստանը:
Նշվում է, որ Ղազախստանին C-300 համալիրների մատակարարման նախապատրաստությունը մեկնարկել է 2010 թվականին: Ակնկալվում է, որ C-300-ները Ղազախստանին կհատկացվեն անհատույց՝ Ռուսաստանի զինված ուժերի կազմից:
Ռուսաստանն ու Ղազախստանը ՀՕՊ-ի տարածաշրջանային միասնական համակարգի ստեղծման պայմանագիրը ստորագրել են նախորդ տարվա հունվարի վերջին: Ավելի վաղ նման պայմանավորվածություն ձեռք էր բերվել Բելառուսի հետ:
