Ռուս լրագրողներին թույլ չեն տվել ներկա գտնվել Կիևում Քեթրին Էշթոնի ճեպազրույցին
France-Presse լրատվական գործակալության փոխանցմամբ՝ ԵՄ-ի դիվանագիտության ղեկավար Քեթրին Էշթոնը Կիևում կոչ է արել իրական երկխոսություն սկսել Ուկրաինայի իշխանությունների ու ընդդիմության միջև: Էշթոնն ընդգծել է Ուկրաինայում բռնությունների դադարեցման անհրաժեշտությունը:
Նշվում է, որ Էշթոնն այս մասին հայտարարել է Ուկրաինայի նախագահ Վիկտոր Յանուկովիչի հետ հանդիպումից հետո կազմակերպված ճեպազրույցի ժամանակ: Միևնույն ժամանակ ռուսական РИА Новости լրատվական գործակալությունը հայտնել է, որ Էշթոնի ճեպազրույցը երեկ անցկացվել է դռնփակ ձևաչափով:
Նշվում է, որ դրան հրավեր չստացած ռուսական ԶԼՄ-ները չեն կարողացել ներկա գտնվել Էշթոնի ճեպազրույցին: Բացի այդ, ճեպազրույցին ներկա ուկրաինական ու արևմտյան ԶԼՄ-ներին արգելվել է Էշթոնի ու մամուլի հանդիպման մանրամասների մասին տեղեկատվությունը կիսել ռուսական ԶԼՄ-ների հետ:
