Մեծ Բրիտանիայի թագուհին շուտով կծախսի իր վերջին միլիոնը. զեկույց
Մեծ Բրիտանիայի Համայնքների պալատում ներկայացված զեկույցի համաձայն`Մեծ Բրիտանիայի թագուհու խորհրդականները չեն վերահսկում նրա ծախսերը, բացի այդ, միապետական նստավայրերն առանձնապես աչքի չեն ընկնում բարվոք վիճակով:
The Telegraph-ի փոխանցմամբ` ներկայումս թագավորական գանձարանի միջոցները հասել են պատմական նվազագույնին` 1 մլն ֆունտի: Ըստ ներկայացված զեկույցի` թագուհու ծախսերը գերազանցել են եկամուտները, դրա արդյունքում պահուստային ֆոնդի միջոցները 2001թ. 35 միլիոն ֆունտի փոխարեն ներկայումս հասել են 1 միլիոնի:
Միաժամանակ նշվում է, որ Բուքինգհեմյան պալատն ու Վինձորյան ամրոցը շտապ վերանորոգման կարիք ունեն: Շենքերի որոշ մասերում անձրեւի ժամանակ կաթում է, իսկ ջեռուցման հին համակարգերը մեծ ծախսեր են պահանջում:
Թագավորական կարիքների համար բյուջետային միջոցներն անցած տարի ավելացել են 5 միլիոն ֆունտով կամ 15%-ով: Ըստ պարբերականի` շատերը դա անարդար են համարում, քանի որ թագուհին Մեծ Բրիտանիայի ամենահարուստ անձանց ցուցակում է:
