Ուկրաինայի ժողովուրդը դուրս է եկել Մայդան` ոչ ընդդիմության առաջնորդների պաշտոնների համար. Տիմոշենկո
Ուկրաինայում ստեղծված իրավիճակից ելքը կարող է լինել միայն բոլոր քաղաքական գործիչների կողմից ժողովրդի պահանջների կատարումը, ուստի ընդդիմադիր կուսակցությունների առաջնորդները չպետք է ընդունեն իշխանության կողմից առաջադրված պայամանները, հայտարարել է նախկին վարչապետ Յուլյա Տիմոշենկոն:
«Ես դիմում եմ ընդդիմության առաջնորդներին իշխանության կողմից առաջարակված նվաստացուցիչ պայմանները չընդունելու խնդրանքով»,-ասված է Տիմոշենկոյի` ընդդիմադիր առաջնորդներին ուղղված ուղերձում:
«Ուկրաինայի ժողովուրդը դուրս է եկել Մայդան` ոչ ընդդիմության առաջնորդների պաշտոնների եւ ոչ անգամ բռնապետական օրենքները չեղյալ հայտարարելու համար: Մարդիկ ձգտում են արմատապես փոխել իրենց կյանքը, Ուկրաինայում արդարություն հաստատել եւ ճանապարհ բացել դեպի եվրոպական արժեքներ: Ճգնաժամից ելքը կարող է լինել միայն բոլոր քաղաքական գործիչների կողմից ժողովրդի պահանջների լիակատար իրականացումը»:
