Յացենյուկը դեռ վերջնական որոշում չունի` կընդունի վարչապետի պաշտոնն ստանձնելու առաջարկը, թե ոչ
![](https://168.am/wp-content/uploads/2013/12/kiev11.jpg)
Ուկրաինական ընդդիմադիր «Բատկիվշչինա» կուսակցության առաջնորդ Արսենի Յացենյուկը հայտարարել է, որ ուկրաինական ընդդիմությունն առայժմ չի ընդունել, բայց չի էլ մերժել Ուկրաինայի նախագահ Վիկտոր Յանուկովիչի առաջարկը, հաղորդում է «Газета.Ru»-ն: Հիշեցնենք, որ ընդդիմության առաջնորդների հետ հանդիպմանը Յանուկովիչը Յացենյուկին առաջարկել էր վարչապետի, իսկ Կլիչկոյին`փոխվարչապետի պաշտոնը:
«Եթե մենք հրաժարվենք, մեզ կմեղադրեն նրանում, որ առաջարկեցին իշխանություն, հնարավորություն տվեցին Ուկրաինան տանել դեպի Եվրոպա, բայց մենք մերժեցինք դա: Եթե մենք ընդունենք այն, ապա կառավարությունն ու քաղաքացիները մեզ կմեղադրեն դավաճանության մեջ, եւ այդպիսով մարդիկ չեն հասնի նրան, ինչի ձգտում էին», նշված է Յացենյուկի հայտարարության մեջ, որը տեղադրվել է նրա կուսակցության կայքում:
Նա նշել է, որ ընդդիմությունը «հրճվանքի մեջ չէ» Յանուկովիչի առաջարկից, քանի որ այդ առաջարկով Ուկրաինայի ղեկավարությունը փորձում է ներքին խնդիրների պատասխանատվությունը դնել եվրաինտեգրացիայի կողմնակիցների վրա: Ֆեյսբուքյան իր էջում Յացենյուկն ավելացրել է, որ վարչապետության հարցը դնելը կոռեկտ չէ. «Դա պետք է լինի Մայդանի, ոչ թե Յանուկովիչի որոշումը»: