Հարությունյանը վստահ է, որ ԵԽԽՎ-ում հայաստանյան պատվիրակության լիազորությունները կհաստատվեն
Եվրախորհրդի խորհրդարանական վեհաժողովում հայաստանյան պատվիրակության ղեկավար Դավիթ Հարությունյանը համոզված է, որ գալիք երկուշաբթի մեկնարկող ԵԽԽՎ նստաշրջանում պատվիրակության լիազորությունները հաստատվելու են:
«Բացարձակ վստահություն ունեմ, որ հանձնաժողովը հանգելու է այն եզրակացության, որ Հայաստանի Ազգային ժողովը կանոնակարգի դրույթների որևէ խախտում կատարել», – «Ազատության» հետ զրույցում նշել է Հարությունյանը:
Հիշեցնենք. կազինոյում խաղալու մասին ԵԽԽՎ-ում Սերժ Սարգսյանի հարց հղելու հաջորդ իսկ օրը Ազգային ժողովի նախագահ Հովիկ Աբրահամյանը հայտարարեց, որ հունվարի 1-ից «Ժառանգություն» խմբակցության պատգամավոր Զարուհի Փոստանջյանն ընդգրկված չի լինի հայաստանյան պատվիրակության կազմում, իսկ նրա տեղը կզբաղեցնի Մհեր Շահգելդյանը (ՕԵԿ):
Փոստանջյանը, սակայն, վստահ է, որ իր լիազորությունները կվերականգնվեն: Նա հոկտեմբերից նամակներ է հղում Խորհրդարանական վեհաժողովի տարբեր պաշտոնյաներին:
Լիազորությունների հարցը կարող է քննարկման առարկա դառնալ, եթե 10 պատգամավոր ոտքի ելնի ու պահանջի դա: Դավիթ Հարությունյանի կարծիքով, 10 պատգամավոր անշուշտ կգտնվի. գործընթացի կազմակերպությումը բացարձակապես դժվար չէ: Բայց դա նրան այնքան չի հուզում, որ պատվիրակության իշխանական ղեկավարն անգամ չի պատրաստվում Հայաստանի շահերը պաշտպանել. – «Պաշտպանելու կարիք չկա: Ես Ձեզ ընդամենը ասում եմ արդյունքը և ասում եմ իմ կարծիքը, որ այդ արդյունքը հարյուր տոկոսանոց երաշխիք ունի»:
Հարությունյանը հաստատեց, որ Փոստանջյանը հենց Սերժ Սարգսյանին ուղղված հարցի համար է հանվել պատվիրակության կազմից. – «Դա նսեմացնող քայլ էր: Ոչ թե երկիրը նսեմացնող, այլ ընդդիմությունը և ընդհանրապես Հայաստանի Հանրապետությունում քաղաքական պայքարը նսեմացնող քայլ էր»:
Հայկական պատվիրակության մշտական անդամ, ՀԱԿ խմբակցության ղեկավար Լևոն Զուրաբյանը newsbook կայքին տված հարցազրույցում ասել է, որ եթե Եվրոպայի խորհրդում քննարկվի հայկական պատվիրակության լեգիտիմության հարցը, նա ոտքի կկանգնի` ի աջակցություն իր գործընկերոջ` Զարուհի Փոստանջյանի:
Պատվիրակության մյուս հիմնական անդամը`Նաիրա Զոհրաբյանը (ԲՀԿ) «Ազատության» հետ զրույցում փոխանցել է, որ ինքը չի աջակցի մեր պատվիրակության լիազորությունների չհաստատման հարցին. – «Չեմ կանգնի ոտքի` վիճարկելու հայկական պատվիրակության մանդատի, լիազորությունների հարցը, որովհետև ցանկացած սոլիդարնոստ պիտի տեղավորվի տրամաբանության մեջ: Եթե ես տեսնեի մեկ նշույլ անգամ, որ խախտվել է ԵԽԽՎ կանոնակարգը պատվիրակությունների կազմավորման վերաբերյալ, ապա, բնականաբար, անպայմանորեն չէի լռի: Որևէ դրույթ չի խախտվել»:
Ամբողջությամբ կարող եք կարդալ սկզբնաղբյուր կայքում:
