Կգան մարդիկ, ովքեր կփորձեն գայթակղել ձեզ և դուրս բերել մեր ընդհանուր ընտանիքից. ԵՄ-ի դեսպանը՝ վրացիներին
Грузия Online-ի փոխանցմամբ՝ Վրաստանում ԵՄ-ի ներկայացուցիչ Ֆիլիպ Դիմիտրովը Գոգետի գյուղի բնակիչների հետ հանդիպման ժամանակ հայտարարել է, որ նրանց մոտ կգան մարդիկ, ովքեր կփորձեն գայթակղել նրանց և դուրս բերել իրենց ընդհանուր ընտանիքից: Դիմիտրովը տեղաբնակներին խորհուրդ է տվել թույլ չտալ խաբել իրենց:
Դիմիտրովը հայտարարել է, որ եթե վրացիները կարողանան հաղթահարել ԵՄ-ի ճանապարհին երկրի առջև ծառացած մարտահրավերները, ապա նրանք կունենան լավ արդյունքներ. «Ես գիտեմ, որ վրացիները հպարտ ժողովուրդ են, և դա նրանց որակներից մեկն է, որը ես գնահատում եմ: Դուք շատ բան եք վերապրել, և դուք չպետք է հանձնվեք:
Մենք հավատում ենք, որ մենք մեկ ընտանիք ենք և մենք փորձում ենք օգնել ընտանիքի անդամին: Ես այնպիսի երկրից (Բուլղարիա) եմ, որն ընդհանրապես ոչ վաղ անցյալում է դարձել ԵՄ-ի անդամ: Ես գիտեմ, թե որքան բարդ է այդ ուղին: Մենք առավելագույնս կփորձենք ձեզ հնարավորություն տալ դառնալ ընտանիքի անդամ, սակայն դա կախված է նաև ձեզանից»:
Հիշեցնենք, որ Վրաստանը նախորդ տարվա նոյեմբերի վերջին Վիլնյուսում նախաստորագրեց ԵՄ-ի հետ Ասոցացման համաձայնագիրը, որի ստորագրումը նախատեսված է այս տարի:
