ԱՄՆ-ը սպառնացել է պատժամիջոցներ սահմանել Ուկրաինայի հանդեպ
France-Presse լրատվական գործակալության փոխանցմամբ՝ Սպիտակ տունը Կիևում հակամարտող կողմերին երեկ կոչ է արել անհապաղ դադարեցնել բախումները՝ սպառնալով պատժամիջոցներ սահմանել Ուկրաինայի հանդեպ: Այս մասին հայտարարել է ԱՄՆ Ազգային անվտանգության խորհրդի պաշտոնական ներկայացուցիչ Քեյթլին Հեյդենը:
ԱՄՆ նախագահ Բարաք Օբամայի վարչակազմը հակամարտության էսկալացիայի պատասխանատվությունը դրել է Ուկրաինայի իշխանությունների վրա, որոնք ի վիճակի չեն եղել ընդունել իրենց ժողովրդի օրինական պահանջները: Հեյդենի խոսքերով՝ Ուկրաինայի կառավարության կողմից խաղաղ ակցիայի մասնակիցների դեմ ուժ կիրառելը խաթարում է երկրի ժողովրդավարական հիմքերը:
Սպիտակ տունը Կիևից պահանջել է ընդունել անհրաժեշտ միջոցներ հակամարտությանը վերջ դնելու համար: Խոսքը գնում է մայրաքաղաքի կենտրոնից հատուկջոկատայիններին հետացնելու, քաղաքական ընդդիմության հետ երկխոսություն ծավալելու, ինչպես նաև հունվարի 16-ին Գերագույն ռադայի հավանության արժանացրած սահմանափակիչ օրենքների չեղյալ հայտարարման մասին:
