Հունաստանը մարտին առաջարկելու է վերանայել ԵՄ-ի վիզային օրենսգիրքը
Ռուսական РИА Новости լրատվական գործակալության փոխանցմամբ՝ ներկայումս ԵՄ-ում նախագահող Հունաստանը մարտի կեսին (10-11-ին) ԵՄ-ում ներկայացնելու է երրորդ երկրների համար վիզային ռեժիմի մեղմացման մասին առաջարկ: Այս մասին այսօր հայտարարել է Հունաստանի զբոսաշրջության նախարար Օլգա Կեֆալոյանին.
«ԵՄ-ում հունական նախագահության առաջնահերթությունը կայանում է նրանում, որ զբոսաշրջությունը պետք է ԵՄ-ի համար դառնա զարգացման քաղաքականության անքակտելի մասը: Դա վերաբերում է ոչ միայն Հունաստանին ու հարավային երկրներին, այլև՝ ողջ Եվրոպային:
Նախագահության ժամանակ Հունաստանն առաջարկելու է վերանայել վիզային օրենսգիրքը, ինչը շատ կարևոր է Հունաստանի համար՝ վերացնելու համար երրորդ երկրների քաղաքացիների (ինչպիսիք են ռուսները, թուրքերը, չինացիները) համար գործող բյուրոկրատական արգելքները, որոնց անհրաժեշտ է վիզա՝ Եվրոպա մուտք գործելու համար: Մենք պետք է դյուրացնենք նրանց մուտքը մեր երկիր»:
