Թունիսի խորհրդարանը համաձայնեցրել է նախագահի լիազորություններն ու գործառույթները
Արաբական Asharq Alawsat պարբերականի փոխանցմամբ՝ Թունիսի հիմնադիր խորհուրդը (ժամանակավոր խորհրդարան) ձայների ճնշող մեծամասնությամբ համաձայնեցրել է երկրի ապագա Սահմանադրության երեք հոդվածները, որոնք հստակեցնում են պետության ղեկավարի լիազորություններն ու գործառույթները: Դրա օգտին քվեարկել է 161 պատգամավոր, իսկ դեմ՝ 3-ը:
Նոր նախագծով Թունիսի նախագահը կարող է այդ պաշտոնը զբաղեցնել 10 տարուց ոչ ավելի ժամկետով և նախագահի պաշտոնում ընտրվել միայն երկու անգամ անընդմեջ: Ընդ որում, Սահմանադրությունն արգելում է ուղղումներ մտցնել այն հոդվածում, որում տեղ է գտել այդ նորման:
Նախագահը գերագույն գլխավոր հրամանատար լինելուց բացի վարելու է երկրի ընդհանուր քաղաքականությունը՝ ներառյալ պաշտպանական, արտաքին ու ազգային անվտանգության հարցերը: Նախագահը կարող է արձակել խորհրդարանը՝ պատգամավորների 2/3-ի համաձայնության դեպքում:
