Պետք է Ասոցացման համաձայնագրի պայմանների վերաբերյալ գործնական բանակցություններ սկսել ԵՄ-ի հետ. Ազարով
Ռուսական РИА Новости լրատվական գործակալության փոխանցմամբ՝ Ուկրաինայի վարչապետ Նիկոլայ Ազարովը հայտարարել է, որ Ուկրաինան պետք է գործնական բանակցություններ սկսի ԵՄ-ի հետ Ասոցացման համաձայնագրի ստորագրման պայմանների վերաբերյալ, որի անքակտելի մասը հանդիսանում է ազատ առևտրի գոտու մասին դրույթը:
Ազարովն այս մասին հայտարարել է Ուկրաինայի կառավարության նիստի բացման ժամանակ: Ազարովը հավելել է, որ փոխվարչապետ Յուրի Բոյկոյին հանձնարարել է խորապես վերլուծել հայրենական տնտեսության համար ԵՄ-ի հետ ազատ առևտրի գոտու ստեղծման հետևանքները:
Ազարովը համոզվածություն է հայտնել, որ եվրոպացի գործընկերներն ըմբռնումով կմոտենան այդ փաստերին, երբ իրենք ներկայացնեն դրանք: Ազարովի խոսքերով՝ այդ աշխատանքները պետք է իրականացվեն շատ սեղմ ժամկետում:
