Մադուրոն առաջին անգամ սեղմել է ընդդիմադիր առաջնորդ Կապրիլեսի ձեռքը
Ռուսական РИА Новости լրատվական գործակալության փոխանցմամբ՝ 2013 թվականի ապրիլին Վենեսուելայում անցկացված նախագահական ընտրություններից հետո տեղի է ունեցել նախագահ Նիկոլաս Մադուրոյի ու ընդդիմության առաջնորդ Հենրիկե Կապրիլեսի առաջին հանդիպումը:
Դա տեղի է ունեցել երեկ՝ հանցավորության դեմ պայքարի խստացման մասին խորհրդաժողովի շրջանակներում: Քաղաքական հակառակորդներն առաջին անգամ սեղմել են միմյանց ձեռքը, ինչը տեղի է ունեցել նահանգապետների հետ նախագահի հանդիպումից առաջ:
Հանդիպման ժամանակ քննարկվել են հանցավորության դեմ պայքարի հեռանկարները: Հանդիպումը կազմակերպվել է այն բանից հետո, ինչ երկրում սպանվեց «Միսս Վենեսուելա 2004» Մոնիկա Սփիրը:
Կապրիլեսը նախագահական ընտրություններում հանդիսացել է Մադուրոյի հիմնական մրցակիցը և ցայժմ չի ճանաչել այդ ընտրություններում Մադուրոյի հաղթանակը, ով հաղթել է նվազագույն առավելությամբ:
