Ռուսաստանը մտադիր է փորձարկել մոդուլային սկզբունքով ռազմանավ կառուցելը
Ռուսական РИА Новости լրատվական գործակալության փոխանցմամբ՝ Ռուսաստանը մտադիր է ոչ մեծ ջրատարողությամբ կորվետի կառուցման ժամանակ փորձարկել մոդուլային սկզբունքը: Այս մասին հայտարարել է Ռուսաստանի ՊՆ-ի մամլո ծառայության ներկայացուցիչը:
Այդպիսի տեխնոլոգիայի արդյունավետությունը գնահատելու է Ռուսաստանի ռազմածովային ուժերի, ռազմածովային ակադեմիայի և Միացյալ նավաշինական կորպորացիայի աշխատանքային խումբը: Հեռանկարային նավի մանրամասների մասին ոչինչ չի հաղորդվում:
Ռուսաստանի ռազմածովային ուժերի հրամանատար, ծովակալ Վիկտոր Չիրկովն ավելի վաղ հայտարարել էր, որ մոդուլային սկզբունքով նավ կառուցելը հնարավորություն կտա արագացնել նավերի նախագծումը և ավելի էժան արտադրել դրանք:
Ակնկալվում է, որ նոր տեխնոլոգիայով կառուցված նավը Ռուսաստանի ռազմածովային ուժերին կհանձնվի արդեն 2018-2020 թվականներին: Չիրկովի խոսքերով՝ մեկ մոդուլային նավը կարող է կատարել այնպիսի առաջադրանքներ, որոնց իրագործմամբ այսօր զբաղվում են տարբեր դասի մի շարք նավեր:
Նոր սկզբունքի շնորհիվ հեռանկարում կարելի կլինի կրճատել Ռուսաստանի ազմածովային ուժերի սպառազինության տակ գտնվող տարբեր տիպի նավերի քանակը:
