Սաուդյան Արաբիան լիբանանյան բանակին հատկացնելու է երեք միլիարդ դոլարի օգնություն
BBC-ի փոխանցմամբ` Լիբանանի նախագահ Միշել Սուլեյմանը հայտարարել է, որ Սաուդյան Արաբիան լիբանանյան բանակին հատկացնելու է երեք միլիարդ դոլարի օգնություն:
Սուլեյմանն այդ մասին հայտարարել է ուրբաթ Բեյրութում գրանցված ուժգին պայթյունի հետևանքով զոհված քաղաքական գործիչ, ֆինանսների նախկին նախարար Մոհամմեդ Շաթթահի հուղարկավորությունից հետո իր հեռուստաուղերձում:
Նշվում է, որ դա կլինի Լիբանանի զինված ուժերի պատմության մեջ ամենամեծ օգնությունը: Հարևան Սիրիայում ընթացող քաղաքացիական պատերազմը սրել է Լիբանանում միջհամայնքային հակասությունները, ինչն էլ վերջին ամիսներին արտացոլվում է բռնության մի շարք ակտերի տեսքով:
Սաուդյան Արաբիայում երկօրյա այցով գտնվող Ֆրանսիայի նախագահ Ֆրանսուա Օլանդը հայտարարել է, որ Ֆրանսիան պատրաստ է զենք տրամադրել լիբանանյան բանակին, եթե այդպիսի խնդրանք ներկայացնի Լիբանանի կառավարությունը:
