Արարատ Աղասյանը վերընտրվել է ՀՀ ԳԱԱ Արվեստի ինստիտուտի տնօրենի պաշտոնում
ՀՀ ԳԱԱ նախագահության դերկտեմբերի 27-ի նիստում ՀՀ ԳԱԱ արվեստի ինստիտուտի տնօրենի պաշտոնում միաձայն ընտրվեց արվեստագիտության դոկտոր, պրոֆեսոր Արարատ Աղասյանը: Այս մասին 168.am-ը տեղեկանում է ՀՀ ԳԱԱ տեղեկատվական- վերլուծական կենտրոնից:
Արարատ Աղասյանը գլխավորում է ՀՀ ԳԱԱ արվեստի ինստիտուտը 2003-ից: Արարատ Աղասյանի գիտական գործունեությունը կապված է Արվեստի ինստիտուտի հետ սկսած 1978թ-ից` Մոսկվայի Մ. Լոմոնոսովի անվան պետական համալսարանի պատմության ֆակուլտետի արվեստաբանական բաժինը ավարտելուց անմիջապես հետո:
Հետազոտությունների հիմնական ոլորտը ` XIX-XX դարերի հայ կերպարվեստի և քննադատական մտքի պատմությունն է: Արարատ Աղասյանը 8 մենագրության, 70 գիտական հոդվածների հեղինակ է: Արժանացել է ՀՀ արվեստի վաստակավոր գործչի կոչմանը, պարգևատրվել` ՀՀ պետական մրցանակով, ՀՀ ԳԱԱ «Պատվոգրով», ՀՀ կրթության և գիտության նախարարության Ոսկե հուշամեդալով, ՀՀ մշակույթի նախարարության Ոսկե մեդալով, ՀՀ պաշտպանության նախարարության «Գարեգին Նժդեհ» մեդալով:
