Ուկրաինայի նախագահական ընտրությունները պետք է անցկացվեն 2014 թվականի մարտին. Կլիչկո
Ուկրաինական UNIAN լրատվական գործակալության փոխանցմամբ՝ ուկրաինական ընդդիմադիր «ՈՒԴԱՌ» կուսակցության առաջնոր Վիտալի Կլիչկոն հայտարարել է, որ Ուկրաինայի նախագահական ընտրությունները պետք է անցկացվեն 2014 թվականի մարտին:
Կլիչկոն այս հայտարարությունն արել է առավոտյան խորհրդարանի՝ վաղաժամ ավարտված նիստից հետո լրագրողների հետ ունեցած զրույցում: Կլիչկոն ընդգծել է, որ ներկայիս ճգնաժամային պայմաններում, որոնցում հայտնվել է Ուկրաինան, ժամանակ չկա առօրյա հարցերի դիտարկման համար, և որ երկրին անհրաժեշտ են վաղաժամ նախագահական և խորհրդարանական ընտրություններ:
Կլիչկոն հիշեցրել է, որ «կլոր սեղանի» ժամանակ Ուկրաինայի նախագահ Վիկտոր Յանուկովիչը հայտարարել է, որ չի վախենում վաղաժամ ընտրություններից: Կլիչկոն պատրաստ է նախագահական ընտրություններում իր թեկնածությունն առաջադրելուն:
Հիշեցնենք, որ Ուկրաինայում նախագահական ընտրություններն անցկացվելու են 2015 թվականի մարտի 29-ին:
