«Ո՞ւմ համար եք պահում ազատ քնելատեղերը, պարոն Թովմասյան». Ն. Փաշինյանն այցելել է «Նուբարաշեն» ՔԿՀ
ԱԺ պատգամավոր Նիկոլ Փաշինյանը նոյեմբերի 14-ին այցելել է «Նուբարաշեն» քրեակատարողական հիմնարկ, որից հետո գրառում է կատարել ֆեյսբուքյան իր էջում.
«ԱԺ նոյեմբերի 14-ի նիստում ՀՀ արդարադատության նախարար Հրայր Թովմասյանը հայտարարեց. «…վերջին 20 տարվա ընթացքում առաջին անգամն է, որ Քրեակատարողական հիմնարկում գերծանրաբեռնվածություն չկա: 4 հազար 300 մահճակալ կա, էս պահին 4 հազար դատապարտյալ եւ կալանավորված կա…»:
Այսօր ԱԺ արտահերթ նիստից հետո պատգամավոր Զարուհի Փոստանջյանի հետ այցելեցինք «Նուբարաշեն» քրեակատարողական հիմնարկ: Մեր մտած երկու խցերում էլ՝ խուց 49, խուց 51՝ 12 քնելատեղ կար, 15 կալանավորված անձ: Բա ու՞մ համար եք պահում ազատ քնեալատեղերը, պարոն Թովմասյան, եթե ՔԿՀ-ները գերբեռնված չեն: Եթե գերբեռնված են՝ ձեր խոսքի արժեքի մասին պիտի մտածենք, եթե գերբեռնված չեն, նշանակում է կալանավորվածներին անհատական քնելատեղից զրկելով նրանց նկատմամբ իրականացվում է խոշտանգում՝ ցուցմունքներ կորզելու նպատակով: Կամ էլ քնելատեղերը վաճառվում են կալանավորվածների վրա: Երեք դեպքում էլ՝ պատասխանատվությունը ձերն է»:
