Իրաքի արտգործնախարարը հոկտեմբերի վերջին ժամանելու է Թուրքիա
Թուրքական Hürriyet Daily News թերթի փոխանցմամբ՝ Իրաքի արտգործանախարար Հոշիյար Զիբարին հոկտեմբերի վերջին այցելելու է Թուրքիա: Թերթի տվյալներով՝ այդ այցի շրջանակներում քննարկվելու են երկկողմ համագործակցությանն առնչվող հարցեր, սիրիական ճգնաժամը, տնտեսական ու տարածաշրջանային հարցեր:
Ավելի քան մեկ տարի է, ինչ Իրաքի ու Թուրքիայի փոխհարաբերություններում նկատվում է լարվածություն: Դրա պատճառներից մեկն այն է, որ Իրաքը Թուրքիային մեղադրում է տարածաշրջանում գերիշխելու փորձեր ձեռնարկելու և հարևան երկրների ներքին գործերին միջամտելու փորձերի մեջ:
Բացի այդ, լարվածությանը նպաստում է Հյուսիսային Իրաքի քրդական ինքնավարության հետ Թուրքիայի էներգետիկ համագործակցությունը: Խնդիրներ կան նաև «Քրդստանի աշխատավորական» կուսակցության (PKK) գործունեության հարցում:
Հիշեցնենք, որ Թուրքիայի էներգետիկայի ու բնական պաշարների նախարար Թաներ Յըլդըզը հայտարարել է, որ Թուրքիան պատրաստ է գնել արտահանման ենթակա իրաքյան ողջ նավթը:
