Վրաստանը պահպանում է հանգստություն՝ չնայած Ռուսաստանի ոչ ադեկվատ արձագանքին. Բիձինա Իվանիշվիլի
Грузия Online-ի փոխանցմամբ՝ Վրաստանի վարչապետ Բիձինա Իվանիշվիլին Թբիլիսիի «Ռեդիսոն» հյուրանոցում հանդիպել է արտասահմանում Վրաստանի դեսպանների հետ: Իր ելույթում Իվանիշվիլին անդրադարձել է Ռուսաստանի հետ Վրաստանի փոխհարաբերություններին.
«Ինչ վերաբերում է Ռուսաստանին, ապա մենք սկսել ենք բարելավել այդ երկրի հետ հարաբերությունները: Ձեզ հայտնի է, որ արդեն իսկ ձեռնարկվել են պրագմատիկ քայլեր՝ Ռուսաստանի հետ հարաբերությունների դրական զարգացման ուղղությամբ, ինչը մասնավորապես առնչվում է առևտրի, տնտեսական ու մշակութային ոլորտներին:
Անհրաժեշտ է ընդգծել, որ մեր (արևմտյան) բարեկամները հավանության արժանացրին ու դրականորեն գնահատեցին Ռուսաստանի հետ երկխոսության նոր ձևաչափը՝ որպես պրագմատիկ կառուցողական քայլ՝ ուղղված լարվածության նվազեցմանը:
Դժբախտաբար հարկ է ընդգծել, որ չնայած մեր մեծ ջանքերին՝ Ռուսաստանը վերստին լարափակոցներ է անցկացրել մեր երկրի խորքում, ինչը հիրավի չի հանդիսանում Ռուսաստանի հետ հարաբերությունների կարգավորման ուղղությամբ մեր իշխանությունների ձեռնարկած քայլերի ադեկվատ պատասխան:
Եվ ամեն դեպքում չնայած մեր դրական քայլերի հանդեպ Ռուսաստանի ոչ ադեկվատ արձագանքին՝ մենք պահպանում ենք հանգստություն և հետևողականորեն վարում ենք պրագմատիկ քաղաքականություն, ակտիվորեն օգգտագործում ենք միջազգային բանակցությունների ժնևյան մեխանիզմը և համագործակցության երկկողմ ձևաչափերը»:
