Երևանի պաշտպանության նախաձեռնությունների միավորումը հայտարարում է բաց մրցույթ շինարարական տեխնոլոգիայի բնագավառում

Երևանի պաշտպանության նախաձեռնությունների միավորումը  հայտարարում  է  Երևան քաղաքի Մաշտոցի պողոտայի N 5 հասցեում գտնվող Կենտրոնական ծածկած շուկայի շենքի Հանրապետական նշանակության հուշարձանի (այսուհետ՝ Հուշարձան) անօրինական հավելումների՝ ներքին և արտաքին մասերում  կառուցված բազմահարկ բետոնե կառույցի, դրան կից սարքերի ապամոնտաժման աշխատանքների կազմակերպման նախագծային փաթեթի մրցույթ:

Մրցույթի  նպատակը

Ընտրել լավագույն շինարարական տեխնոլոգիական լուծումներ ներառող նախագծային մոտեցումներն ու առաջարկությունները նշված հավելման անվտանգ ապամոնտաժման համար։ Այն պետք է ներառի դրա շինարարական աշխատանքների կազմակերպման, անվտանգության միջոցառումներ ու շրջակա միջավայրի վրա նվազագույն ազդեցության ապահւվման,ինչպես նաև Հուշարձանի պահպանված հատվածների վերականգնմանը միտված մասեր։ Այն պետք է միտված լինի Հուշարձանի ներքին ամբողջական տարածության  պահպանմանն ու  արժեվորմանը և նպաստի դրա  պատմական ու ճարտարապետական դիմագծի վերականգնմանը՝ համաձայն ՀՀ Մշակույթի նախարարության՝ «Երևանի թիվ 1 շուկա» ՍՊԸ-ին 2013 թ. ապրիլին հասցեագրված գրության: Համաձայն նշված գրության՝  ՀՀ մշակույթի նախարարությունը «Երևանի թիվ 1 շուկա» ՍՊԸ-ից պահանջել է մշակել շուկայի հետնամասի պահպանված պատերի վերականգնման և ուժեղացման աշխատանքային նախագիծ, ինչպես նաև  պահանջել է «կորցրած կամարների հետագա վերականգնման նպատակով նախագծում կատարել հուշարձանի ներկա վիճակի փաստագրում և ներառել նորակառույցի ծավալի երկաթբետոնյա կոնստրուկցիաների ապամոնտաժման աշխատանքները» (ինչը բխում է Մշակույթի նախարարության գիտամեթոդական խորհրդի 2013թ. մարտի 6-ի նիստի արդյունքներից):

Անհրաժեշտ է

ապահովել – մոնտաժված և տեղադրված էլէկտրական սարքերի և հանգույցների անվնաս ապամոնտաժումը, պատմամշակութային հուշարձանի ներսում կառուցված բետոնե կարկասի աստիճանական ապամոնտաժման աշխատանքների օպտիմալ կազմակերպումը, այս նպատակով գործարկվող շինարարական տեխնիկայի խմբերի ազատ տեղաշարժերը կազմակերպող քարտեզագիրը.

դիտարկել – Հուշարձանի ներսում և ետնամասում կառուցված բազմահարկ բետոնե կարկասի և լրացուցիչ էլեկտրական սարքերի/հանգույցների ապամոնտաժման աշխատանքների առավել անվտանգ կազմակերպման հնարավորությունը՝ շրջակա շենքերի բնակչության անցուցարձը նվազագույնս չափով խոչընդոտելու նախապայմանով.

նախատեսել – շահագրգիռ կողմերի և աջակից կազմակերպությունների հետ համագործակցությունը և աշխատանքային նախագծի հանրայնացումը: Ցանկալի է նաև ներկայացնել Հուշարձանի նախնական ճարտարապետական ընդհանուր ծավալատարածական հորինվածքի վերականգնմանն ու տարածքի լուսավորության և արտաքին տեսքի բարելավմանն ուղղված առաջարկներ:

Կենտրոնական ծածկած շուկայի ազդեցության գոտու /դիտարկվող տարածքի/ սահմանները որոշվում են նախագծող հեղինակի / կազմակերպության կողմից:

Մրցույթի  արդյունքների  քննարկման  ընթացքում առանձնակի  ուշադրության  կարժանանան  հատկապես  այն  առաջարկությունները,  որոնք  հիմնավորված  կլինեն  մայրաքաղաքի  քաղաքաշինական  առկա  իրադրության  համակողմանի  վերլուծությամբ  և  այդ  համատեքստում  առավել  հիմնավոր  լուծումներ կառաջադրեն  ճարտարապետական  միասնականության, պատմամշակութային ժառանգության պահպանման և ժամանակակից կառույցների հետ դրա ներդաշնակման  ապահովման  առումով:

Մրցույթին  մասնակցության  պայմանները

Մրցույթին  կարող  են  մասնակցել՝  բոլոր համապատասխան որակավորում ունեցող (ճարտարապետներ, քաղաքաշինարարներ, շինարարական տեխնոլոգներ, դիզայներներ, քանդակագործներ,  հարակից  մասնագետներ) ֆիզիկական և իրավաբանական անձինք, ստեղծագործական խմբեր անկախ գործունեության վայրից

Մրցութային  հայեցակարգային առաջարկությունների  ներկայացման  ձևաչափը

Առաջարկությունները  ներկայացվում  են  էլեկտրոնային եղանակով՝ համառոտ  բացատրագրով  և  գրաֆիկական  մասով:  Գրաֆիկական  մասը   ներկայացվում  է  ազատ,  այն  անհրաժեշտ  ծավալով ինչը  լիարժեք  բացահայտում  է  հայեցակարգի  հիմքում  դրված  մտահղացումները,  ներառելով՝  գլխավոր  հատակագիծը,  Կենտրոնական ծածկած շուկայի գծագիրը,  կտրվածքները,  անհրաժեշտության  դեպքում՝  առանձին  դրվագները,  եռաչափ  գծապատկերները  և  մանրակերտն՝ ըստ հայեցողության:

Մրցույթի  անցկացման  և  նախագծերի  ներկայացման  ժամկետները

Մրցութի  սկիզբը    սահմանվում  է  2013 թվականի  օգոստոսի 30-ը,  իսկ  ավարտը՝   2013   թվականի  սեպտեմբերի 10-ը:

Մրցութային  առաջարկությունները  էլեկտրոնային տարբերակով ներկայացվում  են  ոչ  ուշ,  քան  2013  թվականի  սեպտեմբերի 10-ը՝ մինչև  ժամը  17.00-ն,  [email protected] էլ.հասցեով կամ https://www.facebook.com/saveyerevan (նաև https://www.facebook.com/merqaghaq ) ֆեյսբուքային հասցեներով:

Մրցույթի  համար  անհրաժեշտ  ելակետային  նյութերը՝

Մրցույթի  համար  անհրաժեշտ  տեղագրական հանույթներ մասնակցները  կարող  են  ձեռք  բերել այցելելով Կենտրոնական ծածկած շուկա, ինչպես նաև օգտվելով նորակառույց հատվածի՝ համացանցում տեղ գտած բազմաթիվ լուսանկարներից և հրապարակումներից:

Մրցույթի   արդյունքների  ամփոփումը 

Մրցութային  հանձնաժողովի  կողմից  մրցույթի  արդյունքների  ամփոփումն իրականացվում  է  մրցութային  առաջարկությունների  շուրջ  կազմակերպված  հասարակական    իրազեկումից   հետո,  բայց  ոչ  ուշ,  քան  2013 թվականի սեպտեմբերի 15-ը:

Մրցույթի արդյունքներով ներկայացված հայեցակարգային առաջարկություններից ընտրված  երեք  լավագույնները  կհանձնվեն ՀՀ Մշակույթի նախարարություն և Երևանի քաղաքապետարան՝ ի աջակցություն համապատասխան աշխատանքների իրականացման կազմակերպմանը:

Երևանի պաշտպանության նախաձեռնությունների միավորում

29.08.2013թ