Ռուստամ Իբրահիմբեկովը մեզ համար ամենաընդունելի թեկնածուն է. Ադրբեջանի իշխող կուսակցություն
Ադրբեջանական Turan լրատվական գործակալության փոխանցմամբ՝ իշխող «Ենի Ազերբայջան» կուսակցության (ԵԱԿ) գործադիր քարտուղարի տեղակալ Սիյավուշ Նովրուզովը «Ամերիկայի ձայն» ռադիոկայանին տված հարցազրույցի ժամանակ հայտարարել է, որ ԵԱԿ-ի թեկնածուն (նախագահ Իլհամ Ալիևը) այլընտրանք չունի ո՛չ երկրի ներսում, ո՛չ նրա սահմաններից դուրս.
«Իլհամ Ալիևին աջակցում է ինչպես երկրի բնակչությունը, այնպես էլ ԵԱԿ-ի 600.000 անդամները: Հենց այդ մարդկանց պնդմամբ է կուսակցության համագումարում առաջադրվել նրա թեկնածությունը:
Ինչ վերաբերում է Ռուստամ Իբրահիմբեկովի թեկնածությանը, ապա ես քանիցս ասել եմ, որ նա մեզ համար ամենաընդունելի թեկնածուն է, որովհետև Իբրահիմբեկովը ոչ մի ժամ չի զբաղվել քաղաքականությամբ: Նա հեղինակ է մի շարք ֆիլմերի, և դրանով ավարտվում է նրա աշխատանքը:
Նա այն մարդն է, ով երբեք չի եղել Ադրբեջանի ժողովրդի կողքին՝ նրա համար վճռորոշ, ճակատագրական, ծանր պահերին: Ես նրան չեմ համարում լուրջ մարդ: Ընտրություններին մնացել է 70 օրից էլ պակաս ժամանակ: Այսինքն, 10 օր անց կտրվի ընտրությունների պաշտոնական մեկնարկը: Ցայսօր Իբրահիմբեկովը չորս անգամ իրազեկել է իր գալստյան մասին, սակայն դա տեղի չի ունեցել:
Մյուս կողմից էլ Իբրահիմբեկովը պաշտոնական թեկնածու չէ: Ազգային խորհրդի մեկ-երկու անդամի հայտարարությունները հիմք չեն: Ընտրանական օրենսգրքի 53-րդ և 54-րդ հոդվածներով՝ թեկնածուն իր նախաձեռնությամբ առաջադրվում է նախաձեռնող խմբի կողմից կամ էլ քաղաքական կուսակցությունների, ինչպես նաև քաղաքական կուսակցությունների դաշինքի կողմից:
Ազգային խորհուրդը չգրանցված հասարակական կազմակերպություն է: Ադրբեջանի օրենսդրության համաձայն, հասարակական կազմակերպությունը չի կարող որևէ ընտրությունում թեկնածու առաջադրել:
Սահմանադրության 100-րդ հոդվածում նշված է, որ թեկնածու դառնալ ցանկացողը չպետք է ունենա երկքաղաքացիություն, չպետք է պարտավորություններ ունենա այլ երկրների հանդեպ, վերջին 10 տարում պետք է մշտապես բնակված լինի Ադրբեջանում: Ռուստամ Իբրահիմբեկովը չի համապատասխանում այս պահանջներից և ոչ մեկին:
Դեռ հայտնի չէ, արդյոք Իբրահիմբեկովը դիմել է ՌԴ նախագահին կից Քաղաքացիության հարցերով հանձնաժողովին: Անգամ եթե նա դիմել է, ապա կան ընթացակարգեր, որոնք ժամանակ են պահանջում: Հանդիսանալով Ռուսաստանի քաղաքացի՝ Իբրահիմբեկովն ինքնաբերաբար պարտավորություններ է ունենում այդ երկրի առջև:
Այդպիսով, Իբրահիմբեկովը պետք է ՌԴ 25 կառույցներից, այդ թվում նաև անվտանգության մարմիններից, ՆԳՆ-ից ու դատարաններից ստանա տեղեկանք, որ պարտավորություններ չունի նրանց: Բացի այդ, վերջին կես ամսվա ընթացքում նա Ադրբեջանում չի բնակվել անգամ մեկ ամիս, ինչը նույնպես չի համապատասխանում Սահմանադրության պահանջներին:
Ադրբեջանում քրեական գործ է հարուցված կինեմատոգրաֆիստների նկատմամբ՝ կապված հարկերից խուսափելու հետ: Չեմ կարող պնդել, թե որչափ է Ռուստամ Իբրահիմբեկովի պատասխանատվությունը, այդ աշխատանքն իրավապահ մարմիններինն է»:
