Роснефть-ը ցանկանում է բաժնեմաս գնել ադրբեջանական «Աբշերոն» գազային հանքավայրի նախագծում
Բրիտանական Reuters լրատվական գործակալության փոխանցմամբ՝ ռուսական Роснефть պետական նավթագազային ընկերությունը ցանկանում է բաժնեմաս գնել ադրբեջանական «Աբշերոն» գազային հանքավայրի նախագծում:
Այս մասին գործակալությանը հայտնել է էներգետիկ ոլորտում համագործակցության վերաբերյալ ադրբեջանա-ռուսական բանակցությունների ընթացքին իրազեկ աղբյուրը: Վերջինիս հաղորդմամբ՝ դրանով իսկ Роснефть-ը ցանկանում է գազի արտահանման հարցում դառնալ Газпром-ի մրցակից:
«Աբշերոն» գազակոնդենսատային հանքավայրը բացվել է 2011 թվականի սեպտեմբերին: Նրանում հայտնաբերված գազի պաշարները գնահատվում են 150-300 միլիարդ խորանարդ մետր գազ: Ներկայումս նրա բաժնետերերն են Total (օպերատոր) ընկերությունը՝ 40 տոկոս, SOCAR ընկերությունը՝ 40 տոկոս և Gas de France-ը՝ 20 տոկոս:
«Աբշերոն» նախագծի շրջանակներում գազի առաջին արդյունահանումն ակնկալվում է 2020 թվականից ոչ շուտ:
