Արարատի մարզպետն այցելել է 99-ամյա տատիկին

Ցեղասպանությունից մեկ տարի առաջ՝ 1914 թվականին ծնված, Արարատի մարզի Դարակերտ համայնքի բնակիչ Աստղիկ Ավետիսյանի մասին 168.am-ի  հրապարակումը՝ «99 տարեկան Աստղիկ տատն իր երեխաների հետ սկայպով է շփվում» վերնագրով, անտարբեր չի թողել նաև Արարատի մարզպետին:

Հիշեցնենք, որ 99-ամյա կնոջ մի քանի զավակներն ապրում են աշխարհի տարբեր երկրներում՝ ԱՄՆ-ում,  Հոլանդիայում, Գերմանիայում, և այսօր նա իր երեխաների հետ սկայպով է շփվում:

Մեր հրապարակումից հետո՝ երկու օր առաջ, տատիկին են այցելել Արարատի մարզպետ Էդիկ Բարսեղյանը, փոխմարզպետը, Դարակերտի գյուղապետ Ղուկաս Սիմոնյանը, «Արարատ» մարզային հեռուստաընկերության աշխատակիցները: Հեռուստատեսության աշխատակիցները  ոչ միայն հավերժացրին այցի կարևոր պահերը, այլև ծավալուն ռեպորտաժ պատրաստեցին 99-ամյա կնոջ մասին՝ զարմանալով նրա բարության, իմացության ու հիշողության վրա: Խնդրեցին երգել, և Աստղիկ տատը երգեց մի քանի տող «Վերքերով լի ջանֆիդա եմ…» երգից՝ հուզվելով իր չչորացած արցունքներով:

Թեև ընտանիքը հարազատների շնորհիվ նյութական խնդիր չունի, այնուամենայնիվ, հյուր չես գնա դատարկ ձեռքով: Գյուղապետն իր համայնքի լուսավոր տատիկին ծրար նվիրեց՝ հասկանալի պարունակությամբ, իսկ մարզպետ Էդիկ Բարսեղյանը՝  ծաղկեփունջ և մեծ արկղ, որի մեջ ինչ կար՝ չիմացվեց:

Արարատ