Ինչպես կազդեն թանկացումները դեղերի գների վրա՝ ըստ արտադրողների
Հայաստանյան շուկայում դեղերի գները կայուն են: Նման հայտարարություն այսօր լրագրողների հետ հանդիպման ժամանակ արեց Դեղարտադրողների և ներմուծողների միության գործադիր տնօրեն Սամվել Զաքարյանը:
«Այս և անցած եռամսյակում գների տատանումներ չկան»,- ասաց Ս.Զաքարյանը:
Հարցին՝ ինչպե՞ս կազդի հուլիսի 7-ից գազի և էլեկտրաէներգիայի թանկացումը դեղարտադրողների վրա, Ս.Զաքարյանը պատասխանեց, որ թանկացումը դեռ նոր է և դեռ վաղ է գնահատական տալ, բայց կազդի այնպես, ինչպես բոլոր ոլորտների վրա:
Ի պատասխան 168.am-ի հարցի՝ արտադրողներն ի՞նչ հաշվարկներ ունեն և արդյո՞ք այս փոփոխությունը կազդի միջազգային շուկայում հայկական արտադրության դեղերի մրցունակության վրա, «Լիկվոր» ՓԲԸ տնօրեն Սերգեյ Մաթևոսյանը տեղեկացրեց, որ էներգակիրների թանկացումն իրենց ընկերության 60 անուն ապրանքատեսականու 10%-ի վրա կազդի 2-5%-ով: Ըստ նրա՝ դա չի նվազեցնի միջազգային շուկայում հայկական դեղերի մրցունակությունը:
