Վրաստանի ԿԸՀ-ը գրանցել է նախագահի առաջին յոթ թեկնածուներին
Грузия Online-ի փոխանցմամբ՝ Վրաստանի ԿԸՀ-ը գրանցել է նախագահի առաջին յոթ թեկնածուներին: Վրաստանի ԿԸՀ-ը հայտարարել է, որ կուսակցություններն ու նախաձեռնող խմբերը հայտեր են ներկայացրել հոկտեմբերի 27-ին կայանալիք նախագահական ընտրություններում իրենց թեկնածուների մասին:
Նախաձեռնող խմբերը ներկայացրել են Միխայիլ Սալուաշվիլիի, Տարիել Խվեդելիձեի, Նեստան Կիրտաձեի, Գեորգի Գախոկիայի, Մամուկա Չոխոնելիձեի, Նիկոլոզ Գոգիջանիձեի թեկնածությունները: Իսկ ահա Լեյբորիստական կուսակցությունը ներկայացրել է իր առաջնորդ Շալվա Նաթելաշվիլիի թեկնածությունը:
Նշվում է, որ դեռ հայտեր չեն ներկայացրել իր նախընտրական կամպանիան սկսած «Դեմոկրատական շարժում» կուսակցության առաջնորդ Նինո Բուրջանաձեն, իշխող «Վրացական երազանք» դաշինքի թեկնածու Գիորգի Մարգվելաշվիլին:
Ակնկալվում է նաև, որ «Միասնական ազգային շարժում» կուսակցությունը ներկայացնելու է Դավիթ Բաքրաձեի, ոչ խորհրդարանական ընդդիմությունը ներկայացնելու է երգիչ Պաատա Բուրչուլաձեի թեկնածությունը: Ակնկալվում է, որ կառաջադրվի նաև նախկին արտգործնախարար Սալոմե Զուրաբիշվիլիի թեկնածությունը:
Մինչև սեպտեմբերի 17-ը նախագահի թեկնածուները պետք է ներկայացնեն իրենց համակիրների 26.000 ստորագրություն:
