Skymouse-ը՝ ապագայի մկնիկը
Համակարգչային մկնիկը գոյություն ունի արդեն ավելի քան 50 տարի, իսկ սարքի ամբողջական այլընտրանքը դեռևս չի ստեղծվել: Skymouse անկախ ծրագրի մշակողները վստահ են, որ վերջապես իրենց հաջողվել է ստեղծել սարքի ավելի առաջադեմ այլընտրանքը: Այս մասին գրում է «Վեստին»:
Skymouse-ը մանիպուլյատոր է, որը թույլ է տալիս կարգավորել համակարգչային էկրանի վրա տեղի ունեցող գործողությունները`ժեստերի օգնությամբ: Իսկ որպեսզի համակարգն աշխատի, անհրաժեշտ է, որ օգտատերն իր 4 մատներին «մատանի» կրի և աշխատասեղանի մոտ ազդանշանի USB ընդունիչ տեղադրի, որից հետո հնարավոր կլինի համակարգիչը ղեկավարել մատների շարժումներով:
Ծրագիրը ֆինանսավորում է հավաքում սոցիալական ներդրումների Kickstarter հարթակում: Արտադրություն սկսելու համար մշակողներին անհրաժեշտ է հավաքել 80 հազար դոլար:
«Ապագայի մկնիկը» թանկ չի լինելու, այն հնարավոր կլինի ձեռք բերել 80 դոլարով:
Սարքի գաղափարը վատը չէ, սակայն հաջողություն կունենա այն կամ ոչ՝ կախված է հիմնականում այն հանգամանքից, թե արդյո՞ք դրանով հետաքրքրված կլինեն ծրագրեր մշակողները:
