«Ռիսկերի կառավարում և ներքին աուդիտ». միջազգային սեմինարը մեկնարկել է
Երևանի «Բեստ Վեստերն Կոնգրես» հյուրանոցում մեկնարկել է ՀՀ կենտրոնական բանկի և ԱՄՆ Դաշնային պահուստային համակարգի համատեղ «Ռիսկերի կառավարում և ներքին աուդիտ» թեմայով տարածաշրջանային 5-օրյա սեմինարը, որին մասնակցում են ՌԴ, Ռումինիայի, Ուկրաինայի, Բելոռուսի, Խորվաթիայի, Չեխիայի, Լեհաստանի, Լիբանանի, Ղրղզստանի, Ղազախստանի, Վրաստանի և Հայաստանի կենտրոնական բանկերի ռիսկերի կառավարման ոլորտի ավելի քան 30 մասնագետներ:
Սեմինարին բացման խոսքով հանդես են եկել Կենտրոնական բանկի խորհրդի անդամ Վախթանգ Աբրահամյանը և ԱՄՆ Դաշնային Պահուստային Համակարգի Տնօրենների խորհրդի բանկային վերահսկողության եւ կարգավորման դեպարտամենտի խորհրդատու Սարգիս Յոգուրջյանը:
Սեմինարի ընթացքում ԱՄՆ դաշնային պահուստային համակարգի բանկային վերահսկողության վարչության աշխատակիցներ Անիտա Ֆիմստերը և Ռոզեանն Ֆերլին ներկայացնելու են ներքին հսկողությանը, ռիսկերի կառավարմանը, կորպորատիվ կառավարմանը և ռազմավարությանը, արտաքին և ներքին աուդիտին, ռիսկերի վրա հիմնված վերահսկողությանը, գործառնական ռիսկերին, փողերի լվացման դեմ պայքարին վերաբերող հարցեր: Անցկացվելու են գործնական պարապմունքներ:
